掏古井蘿拉
今年三八婦女節，Tomb Raider電影系列第三作「盜墓者蘿拉」於香港上畫，我已經買定飛睇。望住票上面印住個戲名，我數數手指先記得原來呢個系列已經陪一眾玩家渡過超過二十年。仲記得96年落188，會聽到Lara Croft雙槍不斷呯呯呯，然後game舖老闆就開始介紹「呢隻鬼佬game好掂，打到上山下海」。再睇吓遊戲封面，雙眼停留響藍色小背心良久不去…
到日版出時真正玩到，淨係響大屋度做泰山跳已經覺得畫面好勁，好立體。記得當時玩到得返半條人命先去到第一個save point。響山洞打恐龍更加玩到我透不過氣，雖然蠱惑狼都有俾大石追嘅關卡，但Tomb Raider設計風格偏向真實（以PS1畫面加上大量想像力…），所以零舍投入。到處爬上爬落，大跳之前要確定走到最邊位，差半步都跌死。心想呢個系列日後必火，果然好快就有第二集，仲令我當時駛盡成副身家買咗張3DFX Voodoo 2，正式投資玩PC遊戲。當時開到四倍FSAA（消鋸齒）已經好威喇。
玩埋第三集，覺得遊戲個方程式開始重複，所以有段時間無再特別追續作。但聽到Angelina Jolie做電影版主角我又突然熱血，其實玩game時已經一直懷疑Lara個造型就係根據佢黎做。動漫或者遊戲主角出寫真集畫集，日本見得多。可以上到時代雜誌封面嘅CG角色就只有蘿拉，前無古人。第二套電影睇埋，然後個系列好似又沉寂一輪。到PS3年代賣到成行成市，去到PS4已經出到第四代嘅Uncharted，玩上手都好多時體驗到當年Tomb Raider嘅影子。
今時今日你話「盜墓者蘿拉」係改篇自遊戲，後生一代男仔可能會以為你講緊2013年果隻reboot版，女仔就當然答你「而我只知道吳彥祖是誰」。咁又係，畢竟新電影裡面Alicia Vikander嘅造型係參照果個版本嘅蘿拉。雖然心裡面安祖蓮娜一早就先入為主做永遠的Lara Croft，但新電影應該都會好睇。
雖然TR已經屬於「老餅回憶系列」，但第三身視點動作遊戲往後成為主流遊戲類別之一，元祖一代帶黎嘅創新要素功不可沒。就算十年後再遊戲reboot一次，然後又有另一套電影，當年有分見證188每一間舖都呯呯呯嘅我，都一定繼續入場支持。唔知大家如果有玩過呢個系列，印象中最震撼又係邊一幕呢？
（手機用家請按此：https://www.youtube.com/watch?v=kol_QkA-HJ0）
John K on YouTube: http://www.YouTube.com/KjohnK
John K on Facebook: http://www.facebook.com/hkjohnk