Ready Player One – 兒時回憶超級大集合
(桌面用戶請按此：http://blog.menclub.hk/johnk/?p=744）
近年興復古，興尋回「兒時回憶」，好多二三十年前嘅經典作品都重新啟動：龍珠超電視一完就公布有新電影，城市獵人又係，連銀河鐵道好似都有搞作。可能我心態年輕，或者唔肯認老，每次睇到「兒時回憶」呢個字眼都覺得自己大多一歲。《挑戰者一號》呢套新戲被譽為係兒時回憶超級大集合，我當然上畫第一時間睇咗。睇完感覺係後悔，下面解釋。
以搵「彩蛋」作為故事主導算有創意，我睇完佩服史匹堡嘅原因（對上一次睇佢導演嘅戲都唔知係幾時…）係佢製造出嘅世界觀。好明顯呢個老牌大導無同時代脫節，因為打從電影開始我已經覺得有生之年真係會活響一個咁樣嘅世界，至於是好是壞就見仁見智喇。另一樣我鍾意呢套戲嘅原因係編劇導演無嘗試去用佢黎批評科技，成個體驗就好似去華納片場玩一日咁，動感刺激新奇冒險，最啱食住爆谷痛快兩個鐘。如果你從小就接觸西方電影同電玩文化的話就再加一分，畢竟大部分香港人嘅童年回憶都比較日化，但當然連日fans都唔會失望啦。中段有個crossover更加係意想不到，而且唔係出現十幾秒，而係成part戲都響果個世界進行，正爆。戲裡面解釋大量經典人物同時出現嘅因由亦十分合理。
作為機迷又有另一番領會：細個玩紅白機見到有Star Wars，未來戰士2，忍者龜等電影名作推出遊戲，無論隻game本身質素如何都玩得不亦樂乎。大個之後開始調轉出現改篇自遊戲嘅電影，例如蘿拉，Hitman。而家響大銀幕上一次見到來自動漫game三方英雄匯集，第一時間捻到嘅係細個同老友吹水，成日都會討論「你估xx同xx隻鞦，邊個會贏呢？」講親都講足成個小息，口水都乾。
既然講到咁精彩，咁點解會感覺後悔呢？就係後悔無叫埋當年班老死一齊入場睇。一班中佬睇完去食飯，傾嘅可能唔係戲中劇情，而係小學睇阿基拉部電單車已經覺得好鬼有型，但其實個故事究竟講乜，同埋中二問你借十蚊買盒SD高達模型好似一直未還。個個變身維園阿伯兼人肉wiki。一套七點場嘅戲飛錢，當係搭咗轉短途時光機。
（手機用家請按此：https://www.youtube.com/watch?v=VYmfEx3taAM）
John K on YouTube: http://www.YouTube.com/KjohnK
John K on Facebook: http://www.facebook.com/hkjohnk