先Post為快：從#BLM事件睇各大遊戲公司領導手法
George Floyd事件搞到滿城風雨，破壞範圍好快咁由地區警局，州政府，去到白宮然後揚威國際。總統再懶理，#BlackLivesMatter呢個hashtag已經全力上線中。目前見到嘅現象係各大知名品牌都紛紛發表聲明，重申公司立場。除咗fb IG twitter出post同埋捐款等等指定動作外，前兩日睇新聞話老牌卡片桌遊Magic The Gathering母公司Wizards of the Coast宣佈永久廢除遊戲中幾張帶有種族歧視意識嘅卡牌。呢啲咪叫做多咗囉。
作為遊戲公司CEO，除非你上星期先入行兼上任，經過LGBT同MeToo等平權運動後一定已經培養咗敏銳觸覺。第一件事當然打電話俾PR叫佢寫post，對好就出。
Head of PR問番你：咪住先，公司內部，唔好話所有員工，連高層都未開會喎？睇定啲會唔會安全啲？
唔會！首先，一個連自己立場都唔清晰嘅公司邊會有人再幫你做事。而且，開得會黎已經遲晒。響呢個資訊發達嘅世界，一樣嘢trending到咗其他業內公司關注嘅程度，24小時內唔響社交媒體發表力撐聲明，就會俾人說三道四。出遲咗又俾人話淆底，搖擺不定。講到尾，現實就係呢類事件寧願撐咗先，最多俾人話多管閒事。唔撐，得罪顧客罷買你遊戲，員工睇你唔起高調離職另謀高就。公司形象收入同時收皮，直接益對家。相反如果我係Head of PR，CEO一朝早打黎叫我出post話公司立場誓死唔撐，我仲驚。
講番BLM運動，當今幾乎所有大小遊戲公司都已經發表聲明，內容大致相同：極力反對一切涉及歧視種族及膚色嘅言行，強調自己公司內絕不容許之餘，仲已經為員工準備好一切諮詢，輔導同訓練用嘅資源。
好嘞，post就出咗，但係作為CEO嘅你，會唔會選擇再用一啲適當嘅行動（重點係「適當」兩個字）黎令公司嘅顧客員工心服口服呢？定係覺得我可以做嘅就係咁多，撐還撐，講錢傷感情。咁樣同前兩年法國恐襲，你響fb頭像加個Pray for France暗花一樣咁廢。我寧願你好似Epic Games，Valve，Take Two同Rockstar咁選擇唔表態。以公司名義捐款係最直接了當嘅行動，Sony，EA，Ubi同SquareEnix都已經捐錢俾唔同黑人平權組織，數目從25萬到一百萬美金不等。Pokemon Go開發公司Niantic表示將會捐出今年Pokemon Go Fest 2020門票收益中至少五百萬美金。微軟，Bungie同Riot Games就無上限match番員工捐款金額。微軟亦邀請公司裡面嘅黑人員工分享業內遇過嘅親身經歷，並響官網發布。
暴雪都未就BLM對外發表任何聲明，人地應該仲忙緊Blitzchung事變嘅善後工作，情有可原。
John K on YouTube: http://www.YouTube.com/KjohnK
John K on Facebook: http://www.facebook.com/hkjohnk