家用電子遊戲從八十年代開始起飛，細個玩過PONG果代基本上可以講係元祖玩家。彈完波就撞磚，撞完磚就撞人，「邊行邊打」從而成為其中一個最易獲得機迷歡心嘅類別。雙截龍，Final Fight，雙打就更加熱血，忍者龜四打直頭爆機後要大家搵棵桃樹舉杯結義。唔少血氣方剛嘅小學雞就係從呢個時代開始同遊戲機結下不解之緣。當進入青春期，發現有女仔呢種生物嘅存在後，有好多人轉移投資目標，但心裡面仍然有一份撩交打嘅心態，只有動作遊戲能夠滿足。

後來時代發展，科技進步，遊戲設計同題材從保守（太難怕你班人唔識玩）去到更放膽，天馬行空，用腦用埋四肢（驚死你話太易玩）。齋打打殺殺越來越唔盛行，要睇睇故事講乜先，有無收集元素先，有無得組隊打先。

經過GTA，Witcher，Batman Arkham等系列嘅寵幸，一隻動作遊戲有「比得上電影的戲劇性」「全開放式版圖」「超大逼力boss戰」「超耐玩角色武器成長系統」似乎已經係指定動作，就算有齊你隻game都未必保證成為百萬大作。響呢個沒隔幾個月就有經典作品被完全重製嘅時代，要跑出絕對唔易，分分鐘連個二十年金漆招牌都打爛。製作團隊Santa Monica Studio深明呢個道理，而且知道出色嘅美風動作遊戲市面上已經去到飽和程度，要殺出重圍一定要較啱角度同觀眾心思。

做開老豆嘅男人未必會再成日發夢做英雄，因為本身每日已經做緊，但做慣英雄嘅男人總有一日會想收爐收火，學習做個好老豆。Tony Stark自己都咁講啦。新GOW三位故事編劇Matt Sophos，Richard Zangrande Gaubert同Cory Barlog就係睇中你班細個無血不歡，爛命一條，遇神殺神嘅七十八十後熱血男兒，而家都開始收心養性，了解家庭嘅重要性。所以呢集嘅主題就誕生了，看似係Kratos教子成長，其實真正成長果個係曾經係冷血鬍鬚佬自己，因為佢要學識為別人而活。當中經歷仍然出現唔少「拳頭」，但就無咗「枕頭」。年輕嘅玩家會著眼動作流暢，北歐風敵人設計精細，個仔嘅AI做得幾好而且合作解謎等元素。對於同故事有深一層共鳴嘅中佬就會好欣賞光頭佬同個仔共同進退共患難嘅親子情，每一次Atreus問老豆我做得好唔好呀，老豆簡單點點頭呢啲位。本身已經係紮實嘅一隻遊戲，再以人性化嘅演繹方法黎講故事同主角成長，呢個就係GOW成功重生嘅原因。

（手機用家請按此：https://www.youtube.com/watch?v=_IpLMofcNKM&t=2359s）

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Uncategorized 個回應 | 20,588 個已瀏覽 |

見到《末日困獸戰》第一個反應就係「咁都開到戲？」，第二反應就係「又係The Rock？」感覺好似剛剛先睇過套又係有電玩同Dwayne Johnson嘅電影，捻真啲先記得係上年套《逃出魔幻紀：叢林挑機》。

「猩猩拆樓」我記得細個響某兒童場玩過，以為係好似Donkey Kong咁打猩猩，原來自己做破壞果個。雖然唔係太吸引但都成功練成連打好手，仲有得捉人黎食。不過記憶中Rampage呢隻遊戲好似無乜交代故事。個主角內心掙扎係點？有無潛台詞？結局係咪發人深省？

其他人唔知，我自己睇《末日困獸戰》就睇得好過癮。呢個世界係需要呢類唔需要用常理解釋，甚至睇到最後已經唔記得開頭，只求果兩小時內令人覺得熱血過癮嘅電影。其實有好多恐怖/暴力B片都係用呢個方程式，例如Sharknado系列，不過始終唔係荷李活製作，至少特技方面會令你發笑多過嘩一聲。同時又需要有The Rock咁嘅型佬坐鎮，個氣氛先圓滿。

Wes Anderson嘅電影會令人覺得「好靚」，Christopher Nolan嘅電影就「好精」，《Rampage》如果令入場觀眾覺得「好癲」其實已經成功咗。就正如King Kong點解會入咗哥斯拉個世界同佢隻鞦，原因無所謂啦，你想唔想睇先？

打機亦如是。我有個朋友從來唔打機，有日話想買部PS4。問佢想玩咩game佢話「射射射，殺殺殺，簡單就好」，結果買咗Battlefield，故事全skip一味掃射，掃到眼訓就關機。身邊鍾意玩三國無雙嘅好多又係純碎追求搵更強大嘅武器，用更強大嘅力量黎做低同一班人。大佬啊出到第八集，黃巾之亂我用手語都可以將個故事倒敘俾你。但呢類不求思考只求痛快嘅遊戲絕對有市場嘅地位，畢竟唔係個個對打機過程中想得到嘅嘢係一樣。

黎緊又有得睇The Rock玩命片《Skyscraper》，今次仲著住義肢跳樓。我期待入場，我個腦亦期待可以放兩個鐘假。

（手機用家請按此：https://www.youtube.com/watch?v=c2UoNxst6J0）

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Uncategorized 個回應 | 20,753 個已瀏覽 |

(桌面用戶請按此：http://blog.menclub.hk/johnk/?p=744）

近年興復古，興尋回「兒時回憶」，好多二三十年前嘅經典作品都重新啟動：龍珠超電視一完就公布有新電影，城市獵人又係，連銀河鐵道好似都有搞作。可能我心態年輕，或者唔肯認老，每次睇到「兒時回憶」呢個字眼都覺得自己大多一歲。《挑戰者一號》呢套新戲被譽為係兒時回憶超級大集合，我當然上畫第一時間睇咗。睇完感覺係後悔，下面解釋。

以搵「彩蛋」作為故事主導算有創意，我睇完佩服史匹堡嘅原因（對上一次睇佢導演嘅戲都唔知係幾時…）係佢製造出嘅世界觀。好明顯呢個老牌大導無同時代脫節，因為打從電影開始我已經覺得有生之年真係會活響一個咁樣嘅世界，至於是好是壞就見仁見智喇。另一樣我鍾意呢套戲嘅原因係編劇導演無嘗試去用佢黎批評科技，成個體驗就好似去華納片場玩一日咁，動感刺激新奇冒險，最啱食住爆谷痛快兩個鐘。如果你從小就接觸西方電影同電玩文化的話就再加一分，畢竟大部分香港人嘅童年回憶都比較日化，但當然連日fans都唔會失望啦。中段有個crossover更加係意想不到，而且唔係出現十幾秒，而係成part戲都響果個世界進行，正爆。戲裡面解釋大量經典人物同時出現嘅因由亦十分合理。

繼續閱讀»

Gaming 個回應 | 27,017 個已瀏覽 | 分類: ready player one|

今年三八婦女節，Tomb Raider電影系列第三作「盜墓者蘿拉」於香港上畫，我已經買定飛睇。望住票上面印住個戲名，我數數手指先記得原來呢個系列已經陪一眾玩家渡過超過二十年。仲記得96年落188，會聽到Lara Croft雙槍不斷呯呯呯，然後game舖老闆就開始介紹「呢隻鬼佬game好掂，打到上山下海」。再睇吓遊戲封面，雙眼停留響藍色小背心良久不去…

繼續閱讀»

Gaming 個回應 | 10,471 個已瀏覽 |

自從學識打機開始，對於每年農曆新年都會多咗一個期待嘅理由：有好多好嘢食，有得同親戚玩，有得拜年逗利是，同埋唔駛返學日日打機！年三十仲分分鐘有得打通頂，平時一定無可能。而家大個咗，無人管我打機不過自己好多時候都頂唔順自發性訓覺。加上又唔係後生，有時放假只想靜靜地響屋企毒一日，好過出去同人逼花市。想趁今日講吓歷年陪我渡過新年嘅幾隻較為印象深刻嘅遊戲，唔知大家又記唔記得邊隻games曾經陪你過年三十呢？

Mario Kart 64（機種：Nintendo 64 推出日期：1996年12月14日）

Party game我其實好少玩，打機都係一個人隨時開黎打，享受一下故事，比較瀟灑。不過N64呢部本身已經設有四個手制插位嘅主機就打破咗我呢個想法：一大班朋友飲飽食醉，一人拎個手制，從按Start一刻大家就發現無朋友做。平時斯斯文文果啲，成功射中龜殼之後發出嘅恥笑聲就最大。記憶中好多識咗好耐嘅朋友第一次大聲爆粗都係響果年發生。

Bio Hazard Code Veronica（機種：Dreamcast 推出日期：2000年2月3日）

經典survival horror遊戲登陸當時最強主機Sega Dreamcast（可惜短命）。呢隻可以話係新年打通頂嘅其中一隻先例，因為幾經辛苦（仲買咗本攻略玩，因為我太無膽）打爆Chris篇，捻住立刻encore攻破埋Claire篇就訓得，點知有個超上癮嘅Battle mode！雖然打Bio重爆多次響第一代攞火箭炮已經領略過，但兩個難度同角色=爆四次都有唔同內容真係好佩服遊戲嘅設計。印象中連打接近48小時之後，最後仲連病幾日，奉勸各位家庭觀眾切勿模仿。

Final Fantasy VIII（機種：Playstation 推出日期：1999年2月11日）

最記得係個全城熱炒價… 不過當時一早訂咗，過年有得玩。咁多隻FF差唔多玩齊，人設黎講呢隻數一數二。音樂好聽，王菲唱「Eyes On Me」就算唔打機嘅都識唱，我當時覺得呢隻歌可以收錄響呢隻Square經典大作上係件好威嘅事。故事方面亦好深刻，前年玩FFXV時我先記得原來第八集時已經用過月亮作主題。一直搵緊機會想打爆多一次，今年可能上PSN買番黎玩。雖然無FFVII咁好有得出次世代完全重製版，但VIII絕對值得回味。

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Uncategorized 個回應 | 8,794 個已瀏覽 |