2018年02月12日

芒亨晚年,你我有責

Screen Shot 2018-02-12 at 9.07.02 PM

2018未到過年,一眾機迷已經忙到不可開交。先有SFV街機版,手提機星之卡比,然後銀魂亂舞,一月尾更係Monster Hunter World,龍珠同FF Dissidia連發。執筆之時好多人已經爆晒MHW玩緊(笑緊)無雙八。如果計埋冷飯就加多隻汪達巨像。當然響香港日本兩地,最突出一隻非芒亨莫屬,呢個品牌本身已經有大量死忠,呢次除咗跨平台推出之外,最重要係差不多一面倒好評,無論出售量同平均評分都係其系列作品中最高。

 

我玩得慢,一來最近好忙,二黎慢慢嘆,反正單機都十分過癮。唔好問我識唔識刷古龍,或者HR30後如何升裝,全部未玩到。不過我已經充分感受到今集同以往相比嘅過人之處,亦明白點解咁多人忍到今年都未買PS4嘅都走去出部Pro機。首先顧名思義,叫得魔物獵人「世界」,再無跨區loading之說,真正成個世界你望得見嘅地方都一口氣去到。之前要load係預咗,所以從未想像到成個感覺差咁遠,一個字「爽」。十幾種武器可供選擇,鼓勵玩家嘗試研究唔同戰術,成功搵到boss弱點而終於戰勝嘅成就感亦加倍。組隊時如何安排各人嘅裝備互補不足就變得更加重要。新要素當然仲有排數,但最終俾到我嘅結論就係今集將芒亨遊戲最令人中毒嘅核心玩法:獵>收集>強化合成,發揮得淋漓盡致。二月放大假,有呢隻看門口真正可以芒亨晚年,邊度都唔駛去。

 

繼續閱讀»

Read More
2018年02月04日

來救地球 救地球 – Dragonball Fighter Z

Screen Shot 2018-02-04 at 9.49.28 PM

要講龍珠,佢雖然唔係我人生第一套睇嘅動漫畫,但絕對係令我最著迷嘅作品。無論人設,畫風,配音(港日都正),配樂等都係屬於頂尖級數。屋企套單行本全集每隔幾年就會拎出黎回味一次。既然亦係機民,龍珠game當然都係從紅白機開始就玩開。雖然自龍珠Z結局以來已經事隔多年,時不時都會仲見到有新龍珠遊戲推出,講開好似每一代遊戲機都出過龍珠遊戲,手機更加唔在講。所以最初見到公布Bandai Namco又出新龍珠,期待唔太高,因為上一隻Xenoverse 2個人感覺麻麻。原創人物雖然有創意,但我又唔係鳥山明,與其整個鬼五馬六嘅角色我其實只想玩番一隻好似超任「超武鬥傳」咁嘅2D對打。

Snap5-2

初次見到龍珠Fighter Z嘅演示片,我眼前一亮。畫面靚就預咗,但能夠咁忠實重現名場面真係令人感動。而且今次開發由曾推出Guilty Gear同BlazBlue系列嘅Arc System操刀,格鬥系統耐玩之餘有深度,你見遊戲未出已經有電競比賽就知。對我黎講一隻好嘅格鬥game除咗可以令高手們大快朵頤之外,最緊要係就算係初心者都可以輕易做出暢快嘅combo。

 

畫面上嘅享受,加上由玩家控制嘅戰鬥節奏,真係除咗「感動」兩個字無其他可以形容我對呢隻game嘅評價。從此以後每當睇到「龍珠超」畫面又崩壞時,立刻開game打番兩舖就係最佳治癒方法。

1554336_1-2

講咗咁耐都仲未提龍珠Fighter Z裡面個故事模式!鳥山明親自操刀,單係人造人21號呢個角色已經比「龍珠超」裡面大部分人設更加令人期待。我目前只開始玩,但眾多龍珠遊戲裡面只有呢隻令我真正覺得睇緊呢個故事嘅延續篇。所以就算響個個獵緊龍嘅亂世,我仍然堅持先攻略Fighter Z。

最後想送首龍珠舊版主題曲的amv(陸家俊ver.)

(手機用家請按此:https://www.youtube.com/watch?v=7ElEf6-BmTc

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

 

(手機用家請按此:https://www.youtube.com/watch?v=6tyMXQxlZpU

 

 

Read More
2018年01月29日

必玩脱出病棟Ω – 東京新宿VR ZONE

Screen Shot 2018-01-29 at 3.38.37 PM

VR呢個詞,響亞洲地區算係禁語。首先唔好講價錢,技術,畫面,眼罩戴得舒唔舒服,一講親VR大家第一個問題總會係「要用幾多位先?」寸土尺金嘅香港同日本,就算係再強勁嘅遊玩體驗都實在無福消受。PSVR都已經算唔需要太多空間,你話整套HTC VIVE響屋企,啲detectors要好似環迴喇叭咁掛四邊牆,加上眼罩同兩支遙控,你隻game未開波阿媽已經幫你提早開年。

Screen Shot 2018-01-29 at 3.17.19 PM

有見及此,Bandai Namco上年投資起咗個新宿VR ZONE,供心思思想體驗吓但又唔想俾龐大嘅入場費嘅人盡情感受一下VR遊戲同其他互動體驗(敬請大家唔好自動加甜⋯)。夏天開張後一直好評如潮,所以今次去東京我一定要試吓。

 

場館離新宿JR站唔遠,其特別嘅外型設計令佢好易搵。入到去首先買飛,你會發現裡面嘅項目都分成四種顏色類別,買一種色嘅飛就可以選擇用作玩該顏色嘅VR體驗。視乎你玩邊樣嘢,所需要嘅配件會有少少唔同,例如Mario Kart有鈦盤,龍珠要雙手戴手腕感應器。老實講,咁遠黎到我其實想所有嘢玩一次,不過時間金錢畢竟有限所以唯有先玩最期待幾隻先。

 

脱出病棟Ω!見到有好似Silent Hill個恐怖護士就知呢個VR勁驚喇。聽聞係全館最恐怖既VR game!玩法係於十五分鐘內坐係輪椅逃出呢間超級陰深既醫院,入面有停屍間呀,仲要係D唔知邊個嘅呼吸聲嘅情況下逃脫,中途仲要避開陷阱同d喪屍既追殺!唔好以為你有一支AK47。。。你係渣住支電筒去照住佢地!我哋玩咗一分鐘到我已經想按紅色按鈕立刻叫停!不過有女仔同我玩,無理由咁弱㗎嘛。真係好驚,你睇片就知道!其實遊戲入面如果有一個人輸咗就要入監倉等朋友嚟救你,最後我英雄救美。。。

Screen Shot 2018-01-29 at 3.16.13 PM

體驗完驚嚇,今次要玩吓!咁當然係要玩孖寶賽車。據說係要排個半小時,不過唔知係咪我哋早入場,排五分鐘就玩得。VR模擬賽車我試過,原來加入任天堂嘅角色同對戰元素以後會好玩咁多!一邊要顧賽事排名之餘,又有道具嘅攻防戰,感覺好似碰碰車多過賽車。一定要搵friend一齊玩,雖然玩完分分鐘無friend做。就算排緊隊時睇人玩緊嘅直播都好過癮,與其著套馬里奧衫響東京街頭玩Go Kart食塵,不如舒舒服服投入蘑菇王國嘅世界內。畢竟揸開真車嘅人應該曾經幻想過向隔離部車個司機碇炸彈。

Screen Shot 2018-01-29 at 3.19.10 PM

遊東京,想體驗最新VR當然唔止VR Zone啦,有不同分店嘅Club Sega亦有VR槍戰遊戲,人多仲可以玩隊際。不過如果唔需要太hardcore或者一家大細,同女友拍拖,去VR Zone最適合不過。

 

我拍咗片比大家睇,如果你去東京,新宿VR Zone係值得一去!

 

(手機用家請按此:https://www.youtube.com/watch?v=IG3_8IJ05z4&t=4s

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More
2018年01月20日

Sorry 囉!我剩係識去東京!x2

Screen Shot 2018-01-20 at 10.09.17 AM

 

東京,對於喜愛遊戲機同動漫嘅我黎講,係個令人又愛又恨嘅城市。愛就唔駛解釋啦,恨就恨唔可以將成個東京帶返香港。

 

曾幾何時,港人真係試過將日本搬返香港:1996年落信和,搭緊扶梯就已經聽到安室奈美惠唱Sweet Sweet 19 Blues。買完新安室同Puffy唱片就會經過雜誌店,買本Boon睇下裏原宿今期著乜先。掀下本書聽到木村唱歌,係喎尋日播左新SMAP x SMAP,買隻vcd又無左幾十蚊。最後當然係睇下Playstation隻Bio Hazard炒完未,好想玩。

 

繼續閱讀»

Read More
2018年01月06日

2017年度 最佳 及 最差 遊戲大獎

bestworst

首先祝各位2018新年快樂,萬事如意,食得訓得玩得,逢game必爆!

 

雖然之前已經選出我今年最鍾意嘅FPS,RPG同手遊,我仍然覺得有必要講講今年最令我滿意同失望嘅作品。

 

2017年John K’s Game of the Year:

 mario

Super Mario Odyssey

 

我係一個三心兩意嘅人,好聽啲講就係興趣多元化,老實講就係每樣嘢都三分鐘熱度。所以無論人同事,如果可以陪我渡過三十年都忠心不變嘅都絕對係難得中嘅難得。遊戲機就係其中一樣,而剛好今年老任嘅馬里奧Switch派台大作就係最好嘅提醒。

 

親切嘅介面同開場,簡單易學嘅操作,恰到好處嘅難度,最重要係一貫輕快放鬆嘅配樂,提醒我打機其實唔駛吓吓講畫面有幾勁,對唔對應4K HDR,有無星級聲優坐鎮,係咪一定要課金,有無電競價值,下略三千字。從紅白機隻孖寶兄弟開始,從拎起控制器按START一刻,我都係從頭到尾享受玩遊戲嘅樂趣,無嘢好問亦無嘢好鬧。咪就係踩敵人,爬高樓,搵月亮,救公主,呢條老掉牙嘅方程式淨係放響Mario身上先有效,因為呢個大叔一早已經入咗你我屋企,連買第一部遊戲機俾你嘅父母都知道係信心嘅保證。

 

Dark Souls有得玩一百個鐘好抵玩?咁請問一百個鐘裡面你啶過幾多次手制?我可以講我十幾個鐘爆Mario Odyssey,成個過程都係心滿意足。如果有日我決心儲晒所有月亮又可以再煲過,點會唔抵玩?唔好同我講三國無雙儲武器可以玩500個鐘啊,你用隻左手黎同結衣BB比,我幫唔到你。

 

2017 John K’s Disappointment of the Year:

e8ebdc8c3e6b9e5584b66d986932635920130905133136

Final Fantasy XV

 

本來直頭連寫都唔想寫佢,不過既然講咗最佳遊戲,順便講埋最差遊戲啦。不過首先要澄清,我知道呢隻係2016年嘅作品,但我其實到咗今年先立定決心將佢煲爆,敬請留意。

 

雖然係最失望,但其實都係因為我對佢特別有期望。唔怪得我,自從光姐死唔斷氣嘅XIII系列自後我就一直等緊響PS4上玩到一隻非MMO嘅FF。畢竟我比較守舊,覺得RPG就係應該好似FF同DQ咁樣嘅。可能因為咁我對Bethesda大作例如Skyrim同Fallout 4都未能太投入。

 

先講FFXV好嘅地方啦:畫面絕對係PS4上數一數二將機能推到極致嘅遊戲,就算無HDR電視都十分養眼。人設方面,十分忠於FF系列風格。四個兄弟揸開蓬車遊山玩水,唔好話FF系列,RPG裡面無乜其他遊戲俾到呢個感覺。Open world全開放環境裡面有好多嘢做,睇黎XIII俾人鬧一本道真係鬧到變咗XV遊戲設計嘅主要方針。

 

唔好嘅地方其實唔係多,可惜全部係關鍵位:四條友唔好話講嘢性格,連著衫都差唔多樣。好多人話呢隻係MK FF我覺得無咩問題,但至少俾多幾個性格鮮明嘅角色黎平衡吓嘛。要救果位公主戲份偏少,如果你有睇遊戲推出之前嘅FFXV大電影Kingsglaive就仲好少少,不過我玩到爆機都真係唔覺得自己著緊救美人呢個目標,反而一班毒L其實自己圍爐打丁更開心。主角公子病末期,出世就有格鬥技巧,有最強武器等佢拎,又已經識魔法,有埋三個朋友陪太子追女仔,幾乎連電話都唔駛自己接,我比較難代入角色。。最重要係我感受唔到FF系列劇本一向嘅拿手好戲,世界同正義面對滅亡,主角勢必要背水一戰果種推動力,光姨個包袱已經重過你。

 

操作唔算難掌握,尤其劍到人到呢招真係用幾多次都覺得型,但係一去到打巨型boss或者地牢關卡時,真係俾個鏡頭玩死唔知幾多次。魔法系統無必要地麻煩,好似唔想你常用咁,呢個可能係自己唔太鍾意一味劈友有關。另一個FF特色:召喚獸,係好型,但唔係見過幾多次。。

 

如果唔係掛FF名,呢隻game已經入選我2017年最喜愛RPG行列,不過我呢個FF常客真係食唔慣呢個風格。再講故事方面都可以做得緊湊啲,男女主角慘啲,比較合我口味。

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More