內有岩田聰！Switch內藏Golf遊戲原來為紀念前社長？
(Image courtesy of Imgur)
－
上星期睇完Nintendo Direct，裡面有齊任記嘅看家本領：有Pokemon，有火紋，有Mario… 短短四十五分鐘裡面有好多令人期待嘅新發佈。但有一定機齡嘅朋友會唔會同我一樣，而家每次睇N Direct最掛住嘅係響2015年過身嘅前任天堂社長岩田聰先生向大家以日英雙語親切問候同答謝所有支持者。通常打過招呼，簡單講解發佈會內容之後，到去片時間前岩田先生都鍾意遞出雙手作出簡單嘅傳統日式「請收看」動作，用英文講一句“Directly, to you”，為精彩內容掀開序幕。
https://www.youtube.com/watch?v=BdQg43n2OaM
（截圖來自Youtube影片：https://goo.gl/atj3hq）
－
(Image courtesy of Wikipedia)
－
唔識佢唔緊要，簡單介紹吓岩田聰嘅功績：北海道出生。80年東京工業大學電腦系讀書時加入遊戲開發公司HAL Laboratory，以半工讀方式與當時雄心壯志打入電玩界嘅任天堂同Namco合作。當時作為北海道室蘭市市長嘅家父極力反對岩田投身呢行，自佢加入HAL之後六個月兩父子無講過一句話。83年第一個參與開發嘅遊戲：Joust嘅紅白機移植版正式面世。其後陸續為紅白機製作嘅遊戲裡面有唔少後來都上咗神台級別，例如Mother，星之卡比。93年接任HAL社長位置，參與Pokemon金／銀同埋其系列遊戲製作。經典名作「大亂鬥」亦出自岩田。02年接任山内溥成為任天堂第四任社長，致力推動硬件開發，NDS，Wii同Wii U佢都有參一手。甚至後來佢離世後推出嘅Pokemon Go當初能夠成事，都係因為佢努力遊說廠商，合作幫任天堂打入手機市場嘅成果。14年發現膽管有腫瘤，切除之後繼續投身工作。15年不幸復發並確診為癌症，岩田聰於同年七月十一號，因併發症去世，享年55歲。為任天堂獻出大半生嘅佢，最後一次出席公開場合係離世前三個月，當時成個人已經明顯十分消瘦。
(以上資料來自 Wikipedia)
咁點解我無端端掛住佢呢？因為今日睇到一個新聞，同最近被北美黑客發現隱藏響Switch主機裡面嘅紅白機遊戲Golf有關。當大家將重點放響老任如何炒舊game冷飯，順便又宣洩埋上星期訂唔到超任Mini嘅不滿同時，原來呢隻Golf好可能係任天堂邀請各位fans向岩田先生致敬嘅心意。
(Image courtesy of Neowin.net)
根據其中一個Switch黑客Plutoo透露，起初發現Switch裡面收埋一隻紅白機嘅Golf，當時各組織成員嘅首要任務當然係「好嘢有免費game玩，快啲解封佢出黎開心些牙先！」然後佢地慢慢覺得事情並無咁簡單…
－
未必係任天堂唔想你地解，而係可能佢想你用一個好特別嘅方法解。
Switch OS個主菜單程式碼裡面，Plutoo發現兩個有趣嘅地方：第一係有段程式係設定響七月十一號啟動，第二就係當啟動呢個程式時（即係每年七月十一），主機會聽取左右joycon嘅六軸感應信號。按特定日期啟動嘅程式唔係新鮮嘢，以前都有遊戲識得響玩家生日祝你生日快樂。奇怪在響Switch主菜單係唔會用到joycon嘅體感功能的，究竟要聽取乜野動作信號？
－
唔通Switch想你用joycon做出某個特定動作？呢個時候，Plutoo猛然醒覺：
2015年七月十一正係岩田聰逝世嘅日子，任天堂會唔會想各位一直支持岩田嘅朋友響呢日都拎起joycon，做一個以往岩田向我地做過無數次嘅“Directly to you”動作，以表達我地並無遺忘佢對老任同遊戲界嘅貢獻呢？定係佢捻多咗？
所以佢開始向網上問有無買咗Switch而又未連接上網嘅玩家，因為一上咗網就會自動update時間日期（其實應該可以先斷線再手動set日期都可以吧 Update：發放消息嘅黑客組織證實Switch主機必須從來未連接過上網先可以用手動調教日期呢個方法，即係我要等到明年七月十一）。剛好網友Fiskerdin話喂，我屋企有部Switch未開盒，等我試試先。Fiskerdin將日期設定為七月十一號，然後按照Plutoo提供嘅步驟，響主菜單做以下三個動作：
1）雙手握joycon，指向地下垂直。
2）將左右joycon拎起到胸口位置，大拇指朝上。
3）同時將兩手推出，手臂伸直，同身體作90度角。
－
響網友fire3element上載嘅Youtube片裡面睇到（Link 大概1:44位置），頭兩次唔成功。第三次做完以上三步後可以清楚聽到Switch發出一聲“Success!”聲效，畫面變黑，然後…
。
。
。
－
https://www.youtube.com/watch?v=CGN6QXv7sfs
-
切完洋蔥，我都好想親身試下呢個祕技，而且我好肯定做到第三步時自己都會忍唔住講一次
“Directly, to you”
任天堂對Golf呢個隱藏遊戲同埋呢個咁窩心嘅解封方法暫時未有評論，所以都未可以肯定係咪編程團隊對岩田聰嘅特別致敬，定係我地一廂情願。我覺得以隱藏程式碼呢個方法紀念岩田先生永垂不巧絕對合情合理，因為佢剛投身任天堂時就係一位程式員。Golf呢隻遊戲尤其特別，雖然當時唔係甚麼大熱作品，但其開發過程咗證明佢嘅膽識同才能。當時任天堂搵咗幾個開發商都無人認頭製作呢隻叫Open Tournament Golf嘅遊戲，原因係紅白機卡帶容量有限，唔可以放入全18個洞嘅遊戲碼。誰知當時都未係正式任天堂員工嘅岩田自告奮勇，話佢做得到。結果佢自行研發一個數據壓縮方法，將18個洞完整收入卡帶，Golf順利如期推出，逃離胎死腹中命運。
－
好，就當呢個純粹係美麗的誤會，其實大家享受緊每個任天堂遊戲，甚至詛咒緊任記開賣超任Mini貨源準備明顯不足時（我認我係其中一個），真係要知道呢位CEO生前曾經為公司出汗出血，以客為先，將最好嘅俾你。絕對唔係賺錢推股價咁簡單㗎。
Fans嘅反應當然超級熱烈，須知道Mr. Satoru Iwata響北美歐洲都大把粉絲，所以大家紛紛留言讚任記不忘本。其中一個網友講「如果呢個真係公司嘅心意，咁呢件將係任天堂近十年做過最“任天堂”嘅事」。
如果大家呢個時候好想重溫番有岩田聰嘅Nintendo Direct，下面link有佢離世前最後一次現身（2015年四月）：
－
（新聞原文 from Kotaku.com：https://goo.gl/DBd8p8）
－
JOHN K on YouTube: https://www.youtube.com/kjohnk
