任天堂最新一代主機Switch 2今日正式發售，早前有幸抽中嘅人或者都急不及待返屋企拆盒開箱。不過任天堂就刻意提醒大家唔好撕掉跟機而來嘅螢幕保護貼，否則可能會出大事！

其實早於今個星期初，外媒《Nintendo Soup》就已經發現歐洲版Switch 2嘅說明書明文提醒玩家唔好撕走跟機黎嘅螢幕保護貼。事實上嗰張保護貼嘅功能同大家平時理解嘅亦有一定差異，其目的唔係在於保護螢幕不被刮花，而係萬一螢幕表面塊玻璃碎裂時，能夠儘量減少碎片飛濺——即係同打風時大家於玻璃窗貼膠紙同一個道理。

類似嘅保護貼其實並不少見。例如之前Switch OLED推出時，其說明書亦有同樣嘅警告字句，部份摺疊式智能電話——例如初代Samsung Galaxy Fold亦有類似嘅保護貼，當年有唔少人誤以為係新機包裝之一，撕開時連個Mon整爛埋。雖然目前未知撕開Switch 2嘅保護貼會唔會造成損壞，但人哋都講到明啦，大家就唔好試啦。

而如果你想額外再加一層保護貼的話，任天堂過去嘅建議係直接貼於跟機保護貼之上，並指即使貼咗兩層都唔會影響螢幕功能及顯示質素。

資料來源：The Verge