如果你用IG用得夠多，或者有機會睇過一位美國「爺爺級」法官判案嘅影片。而呢位為人非常友善溫暖、有時甚至會因為想畀犯人改過機會而主動撤告嘅法官，其實叫做「Frank Caprio」。而近日其家人於社交網站上宣佈，呢位深受美國網民喜愛嘅法官於日前因病去世，享年88歲。

在 Instagram 查看這則貼文

Judge Frank Caprio（@therealfrankcaprio）分享的貼文

1936年出身於美國羅德島普洛威頓斯（Providence）嘅Frank Caprio，自1985年就擔任該區地方法院裁判官。而自90年代末期開始，當地電視台就將Caprio法官審理嘅部份案件經過剪輯成電視節目《Caught in Providence》，後因節目中部份片段被轉載到社交媒體後爆紅，Caprio法官亦越黎越出名。2018年時《Caught in Providence》更開始於全國電視台播放，令Caprio法官成為美國家傳戶曉嘅法律界人物，甚至仲兩次獲得艾美獎中嘅「最佳法律或法庭節目」提名。

隨住Caprio法官於2020年退休，節目亦隨即停播。2023年12月時佢於社交網站上宣佈自己患上胰臟癌，並於去年5月完成治療。可惜嘅係近日佢身體轉差，8月19日時再次入院，僅一日之後就離世。

其家人於其官方Facebook上發文宣佈消息。文中指出Caprio法官「以他的慈悲、謙遜和對人類善良的堅定信念而深受人們的愛戴，他在法庭及其他地方的工作感動了數百萬人的生活。他的熱情、幽默和仁慈為所有認識他的人留下了不可磨滅的印記」，並指Caprio法官嘅精神會「活於他啟發的無數善行中」。