著名大導演Ridley Scott近日在一場座談會上，毫不留情地批評當今電影業，直言大部份電影都係「屎」，所以佢開始翻睇自己以前嘅舊作。

據外媒《Metro》報導，曾執導《Gladiator（帝國驕雄）》、《Blade Runner（銀翼殺手）》、《Alien（異形）》等經典作品嘅Ridley Scott，最近出席英國電影協會舉行嘅座談會，談到電影業現況時表示：「而家全球電影數目真係多到數以百萬計，唔係幾千部，而係幾百萬部...但絕大部份都係『屎』，大約有60%-80%左右吧。剩低40%仲值得討論，當中25%算唔錯，10%係幾好，只有5%係出色佳作。」佢仲提到，現今好多電影都靠數碼特效撐場面，令成本變得更貴，但劇本根本唔掂，強調一部好電影嘅核心始終係劇本。

被問到有咩電影會令佢一睇再睇時，Ridley Scott坦言：「老實講，我覺得而家一切都好平庸，呢種平庸正淹沒我哋。所以我做咗件好可怕嘅事情，就係開始睇返自己嘅作品，仲發現真係拍得幾好，而且永遠唔會過時。例如前幾晚我重睇《Black Hawk Down（黑鷹15小時）》，不禁心諗：『我到底點樣拍出嚟？』不過我都覺得，偶爾都會有好電影出現嘅，見到世上仲有人拍出好電影我就感到欣慰。」

除此之外，Ridley Scott亦強調自己唔會退休，最近已完成同Jacob Elordi合作嘅末日題材電影《The Dog Stars》，同時開始撰寫《Gladiator 3（帝國驕雄3）》劇本。