過去唔少研究都講過，自從智能手機、社交媒體出現，令大家習慣咗頻繁嘅多巴胺刺激之後，大家嘅注意力就越黎越短，稍為有幾分鐘空閒就會拎起手機尋求新一輪嘅快感。

而日前Matt Damon及Ben Affleck呢對好友日前為宣傳Netflix新戲《The Rip》而接受訪問時，就提到Netflix為咗應對大眾注意力變短而提出嘅「製作原則」，例如唔再採用「三幕式結構」，而且亦鼓勵角色靠對白「講述劇情」，等觀眾即使分咗心亦可以跟上情節。

《The Rip》

Matt Damon及Ben Affleck早前登上Joe Rogan主持嘅Podcast節目，並談到為Netflix等串流平台製作電影，與傳統大銀幕電影嘅分別。Matt Damon指出：「我哋以前學拍動作電影時，通常會將動作戲分做三個部份，第一幕有一段、第二幕又有一段，然後累積成一場大嘅、有哂爆炸又盛嘅喺第三段。呢段通常亦係用最多錢拍嘅，佢就係電影嘅結尾（Finale）。但佢哋（Netflix）依家就會話：『我哋可唔可以於頭5分鐘就整段大嘅？我哋想啲人繼續睇落去』。」Matt Damon續指：「而且要啲角色用對白重複交代劇情三四次亦唔係壞事，因為啲人一邊睇戲一邊都睇緊部電話。」

不過Ben Affleck就似乎唔太同意Netflix嘅「原則」。佢話：「但你去睇下《Adolescence》（混沌少年時），佢就無做呢啲垃圾嘢，但佢一樣好L好睇，而且好黑暗，悲劇得黎又緊張。個男人發現佢個仔被指控謀殺，然後就係一個長鏡頭影住佢哋個後腦，到佢哋上車，完全無人講過嘢。」Matt Damon指出《Adolescence》「係一個例外」，而Ben Affleck就認為係「示範咗唔使搞咁多嘢」都依然可以吸引到觀眾嘅注意力。

有趣嘅係，早年香港觀眾對「大台劇」嘅批評之一，就係所有劇情都係靠對白交待，連角色行開行埋都真係要講出口。當時就有人分析指大台劇主要觀眾係一眾師奶，而師奶係唔會坐定定喺電視面前睇哂成套劇，所以就要靠對白講出黎令佢哋知道劇情發展。所以某程度上，目前Netflix嘅做法其實都算係「師奶劇化」嘅表現？

資料來源：Deadline