Netflix日前公佈2025年嘅財政報告，數據顯示去年初嘅加價無阻大家繼續「Netflix & Chill」，其訂閱人數再創新高，營業額亦有大幅增長。而喺同一日，Netflix亦正式向Warner Bros. Discovery（WBD）提出新嘅全現金收購方案，CEO Ted Sarandos 更強調收購Warner Bros.後會維持45日院線上映檔期，揚言「要贏票房」。

先講Netflix財政報告。據Netflix財政報告顯示，其2025年財政年嘅營業額為450億美金，比起2024年高出16%。其中廣告收入更係升咗2.5倍達15億。另外Netflix亦公佈訂閱人數由去年嘅3.02億升至3.25億，單年就增長咗2300萬人。

當中要特別留意嘅係，去年年初Netflix宣佈美國地區加價，其中有廣告嘅最低級別由6.99美金加到7.99美金，不含廣告嘅標準計劃亦由15.99加到17.99，但訂閱人數依然有所增長，顯示即使加價但大家仍然離唔開Netflix。另外Netflix自去年初起就無再公佈訂閱人數，但今次財政報告中就有特別提及，相信係內部都覺得數字相當漂亮，值得對外宣揚一下。

或者係因為財政成績唔錯，Netflix於同一日亦正式向WBD提出新嘅全現金收購方案。之前Netflix提出以每股23.25美元現金，再加4.5美金嘅Netflix股票，總計827億從WBD手中收購Warner Bros.電影及串流業務。不過後來Paramount Skydance向WBD股東提出全現金嘅惡意收購，所以今次Netflix算係跟上Paramount方面嘅提案，為股東們提供更確定嘅財務條件。

此外Netflix CEO Ted Sarandos 亦於上週公開宣稱，收購Warner Bros.後仍然會維持45日嘅院線上映檔期，更揚言「如果我哋要進入院線事業，我哋就要贏！我要贏開畫週末，我要贏票房。」

就咁睇，Netflix本身財政就非常穩健，依家又肯公開承諾會維持院線檔期，又肯跟進全現金報價。睇黎收購Warner Bros.應該係時間問題啦。

資料來源：IGN、Deadline