邊個估到一隻出咗成25年嘅Game（原版2000年推出），今時今日仲會有全新DLC？Blizzard Entertainment今日突發宣布，《暗黑破壞神 II》重製版《暗黑破壞神 II：獄火重生》將推出全新資料片《術士軍臨》，除咗加入全新職業「術士（Warlock ）」，仲追加拾取篩選器功能同增加儲物箱分頁，寶石亦終於可以堆疊。

今次推出嘅《術士軍臨》，係繼2001年《毀滅之王（Lord of Destruction）》資料片加入刺客同德魯伊後，相隔足足25年再有新職業加盟《暗黑2》世界。據官方介紹，術士可專精於三大技能樹，惡魔束縛、邪異武器同混沌技藝。玩家能夠召喚羊頭人、魔汙怪、褻瀆者等惡魔助戰，為武器注入強大嘅咒術增加攻擊力，亦可以用法術遠程及大範圍攻擊敵人。

除咗新職業，最令老玩家感動流涕嘅就係遊戲體驗上嘅改善。包括拾取篩選器（Loot Filter），讓玩家可以自訂過濾規則，唔使再喺滿地戰利品入面，搵真正值錢嘅寶物。另外，官方仲大幅增加儲物箱分頁，同埋寶石、符文、鎖匙都變成可以堆疊，對於有大量物品嘅玩家嚟講，終於唔洗再開幾十個「Mule角」黎擺野啦。

由今日起《暗黑破壞神 II：獄火重生》全新資料片《術士軍臨》已登陸Battle.net、Steam、Xbox Series X|S、Xbox One、PS5/4及Nintendo Switch多個平台，遊戲本體連DLC售價為HK$288，齋DLC售價則為HK$188。