經典面具殺人狂「Ghostface」再次殺出個血路！雖然早前經歷過主演大換血同幕後風波，但《奪命狂呼7（Scream 7）》似乎完全無受負面新聞影響。電影上周五於北美開畫，即刻以驚人姿態打破整個系列最高開畫票房紀錄，證明呢個擁有30年歷史嘅恐怖片IP依然極具吸金力！

據外媒《Deadline》報導，《奪命狂呼7》在北美上映首周末狂收6,410萬美元，大幅拋離上一集《奪命狂呼6》創下嘅4,440萬美元紀錄；加上海外市場嘅3,310萬進帳，全球首週末總票房高達 9,720萬美元。雖然今集嘅製作費高達4,500萬美元（係成個系列最貴嘅一集），但單靠開畫頭幾日個勢，幾乎可以肯定回到本，接下來只係睇下會賺得幾多。

至於點解今集票房會咁勁，最大功勞絕對要數到元祖女主角Neve Campbell（飾演 Sidney）同埋Courteney Cox嘅強勢回歸。報導指，今集破紀錄嘅4,500萬美元預算，當中好大部份就係用咗聘請佢哋回歸，兩人片酬加埋就已經高達900萬美元。而事實亦證明呢筆錢絕對值得，事關根據觀眾調查數據，有高達56%觀眾入場係因為「熱愛呢個系列」，另有30%觀眾明確表示係衝住「演員陣容」而嚟，可見「賣情懷」呢招非常有效。

不過有趣嘅係，雖然票房大爆，但電影評價卻出現嚴重兩極分化。目前在影評網站Rotten Tomatoes上僅獲得33%新鮮度（影評人評分），係全系列最差嘅一集，不過觀眾評分就有78%，形成極大反差。綜合多則影評，影評人主要係踩套戲劇情老套、太過依賴情懷、結局牽強；但對於系列死忠Fans嚟講，呢啲可能都唔係重點，見到Neve Campbell再次化身Sidney對抗Ghostface，加上血腥砍殺場面同滿滿嘅情懷致敬，就已經非常收貨。電影將於3月5日於香港正式上映，唔知香港觀眾又會讚定係彈嘅多啲呢？