由「咕嚕」Andy Serkis自導自演、Peter Jackson擔任監製嘅《魔戒》全新電影《The Lord of the Rings: The Hunt for Gollum》，近日再傳出重大選角消息！奧斯卡金像影后Kate Winslet將會加盟擔任女主角，但具體角色尚未公布。

據外媒《Deadline》報導，Kate Winslet已正式落實參演呢部中土世界新作，不過角色細節仍處於保密狀態，暫時未知佢係咪飾演一位全新原創角色（好似《哈比人》系列入面嘅Tauriel咁），抑或接替舊版《魔戒》電影嘅角色，又或者演繹J. R. R. Tolkien筆下其他人物，不過有呢位好戲之人坐鎮，相信都足以令影迷嘅更加期待。順帶一提，今次亦係Kate Winslet繼1994年電影《Heavenly Creatures（罪孽天使）》後，相隔超過30年再度同Peter Jackson合作，對兩人同一眾影迷嚟講都別具意義。

《The Hunt for Gollum》預計於今年5月至10月於紐西蘭取景拍攝，並計劃於2027年12月正式上映。據了解，電影故事將會聚焦咕嚕喺《哈比人》遇上比爾博（Bilbo）並失去魔戒，直到喺《魔戒三部曲》與佛羅多相遇之前嘅一段空白時期，期間有唔少角色四處尋找咕嚕，希望從佢口中得知魔戒嘅下落，包括甘道夫、亞拉岡（Aragorn）以及索倫（Sauron）嘅軍隊。

Ian McKellen同Elijah Wood早前已表明會回歸飾演「甘道夫」同「佛羅多」。至於Viggo Mortensen會否回歸再演亞拉岡，目前仍然係未知之數。