早前Matt Damon及Ben Affleck於宣傳Netflix電影《The Rip》時，大爆Netflix對於旗下製作有「頭五鐘要有爆點」、「不斷用對白解釋劇情，因為觀眾會玩電話分心」等製作原則， 令唔少荷里活創作者感到不滿，甚至早前嘅奧斯卡頒獎禮上都有拎呢件事黎取笑。不過多位Netflix高層日前就公開否認有類似「原則」，仲話佢哋聽完都「得啖笑」咁話。唔知各位觀眾又信唔信佢哋呢？

林暐

Jinny Howe

話說日前Netflix舉行記者發佈會，席間Netflix電影部主管林暐（Dan Lin）就被問到「製作原則」於奧斯卡頒獎禮上被取笑一事，而佢嘅回答係：「我哋睇到嗰段都覺得好笑呀！不過我哋根本就無呢啲『原則』。你去睇下我哋啲戲或者劇，我哋根本就唔會重覆劇情。我都唔知呢啲言論喺邊到黎。可以肯定嘅係，我哋專注於製作好電影。」

同場嘅Netflix劇集部主管Jinny Howe亦幫口，指首席內容長Bela Bajaria「某程度上係『解釋性警察』，非常反對過度解釋…我哋知道觀眾有幾醒，亦知佢哋有幾專心睇戲，會將佢哋當係有深度嘅聰明人黎對待。」佢再補充道：「如果你覺得我哋會畀啲咁差嘅評語，而佢哋又會照單全收的話，咁就太侮辱啲創作者啦。」

Bela Bajaria

另外，媒體亦關注Netflix收購Warner Bros.失敗後會否影響佢哋之前嘅「45天院線上映」承諾。對此首席內容長Bela Bajaria就強調之前嘅承諾係針對（假如成功收購後）Warner Bros. 電影，而Netflix本身係「另一門生意」。林暐嘅口風就相對溫柔，佢話：「我哋係串流行先嘅公司，而呢個策略對我哋黎講非常有用。但透過之前Warner Bros.一事，我哋同院線有更親密嘅關係，我哋會發掘下有咩特別活動可以於院線內舉行（按：大概係如之前於院線上映《Stranger Things》大結局），畀啲時間我哋諗下。」2

資料來源：Variety