2018年10月12日

《停止進步的男人》

D8933DC5-824C-434A-9D54-A4A81A40747D
 
網上資料圖片
 
識唔識朋友喺最近幾年都無進步過?
 
工作日日如是,打份牛工返工放工炒吓股去吓旅行,升到一個知自己唔會再升嘅位,轉工又嫌煩;生活結婚生仔,日日講日日呻,但又唔會有改變,踢一下郁一下。
 
有人話學習嘅黃金時期係十幾歲,我唔同意,可能當時你吸收得快,但你只不過係被填鴨式地接收知識,到你真係出嚟做嘢時,你先會諗,究竟自己要學乜,要吸收乜,可能你會吸得慢少少,但起碼每一種知識都對你有用。
 
不過有更多人放棄去理解新知識,放棄去學習,會問點解要學?我依家做乜咪學乜,仲要我花更多時間去學新嘢?傻的嗎?
 
佢哋唔會諗,當你學新嘢,你嘅世界會更大更闊,你亦有更多選擇權利,更有可能改變自己,而你學習亦會有唔同際遇,遇上更多同類嘅人,有一個更好嘅人際關係。
 
因為一個先付出後回報嘅模式,佢哋唔會習慣,學一樣嘢會唔會一定帶比佢哋回報?佢哋計得好足,完全唔諗一樣嘢係可以長線投資,只著重眼前,就會忽視更遠,而呢班人就停止進步,係自己嘅生活圈踱步,到有起困難,想走都走唔到。
 
唔單止工作上,有好多人生活上都係一成不變,試新嘢?不了。
 
無新興趣,無新目標,慢慢就連自己擁有嘅愛好都消失……
 
有個朋友,佢做嘢之後成個人都變得好奇怪,以前都會打波打機,但愈來愈沉悶,叫佢去行山游水玩鏢都話費事,最後就連叫佢打機打波都唔再出現,真係有咁忙?有次我喺街見到佢,佢個人好似行屍走肉咁,問佢最近忙咩,佢話返工放工,返到屋企上網睇劇打機就瞓,我話搵日出嚟打波啦,佢話:都無打咁耐,唔拖累你哋喇。
 
自此,佢就消失係我哋一群人之中……
 
人生究竟應該係點?香港人愈來愈悲,好似乜希望都無,但只要你肯學習,唔係叫你去讀master之類,而係你吸收新事物,新興趣,你嘅人生就會有光彩。
 
新聞有報唔少人走投無路自殺,好多人話要關心身邊人,有乜嘢睇開d啦,但其實,唔係去到最後一刻先嚟解決,而係你一直都無好好嘅進步,無論事業定生活,最後先踏上一條不歸路。
 
每個人身後都有一道懸崖,你唔向前走,好易就會跌落去。
 
蔣薇
www.fb.com/maydreaming

Read More
2018年10月05日

《真.兄弟手信》

WhatsApp Image 2018-10-05 at 12.43.54 PM
 
去旅行買手信係一場掙扎,買俾邊個,買咩野,唔係易諗,所以手信都分三六九等。
 
最低等係,求其係機場執盒蛋糕啊餅啊,再一盒分n人;
中等少少嘅係,問定佢想要乜,特別為佢去買;
最高等係,你會花時間去睇,去諗呢個人(茂利)想要乜。
 
男女好唔同,閨蜜買手信,一定係一種心意,佢收到會大叫,嘩好靚好鍾意啊!!!但兄弟唔同,除咗心意,仲可以加多少少……惡意,務求佢收到,嘩屌你啊,仆街啦你,你呢個人渣,佢叫得愈大聲,你就愈高興。
 
經過上次我寫過一篇文關於AV女優,以及正版嘅文後,朋友去日本,真係選擇送一隻正版AV俾我哋做手信,大家相處咁耐,幾乎已經好清楚大家喜歡嘅類型、女優、劇情、人數、賣點。
 
當派發獎品時……
 
阿強,你喜歡大波嘅,呢套片就肯定啱你,仲好童顏添;
阿俊,你就係貧乳控,營養唔多夠,唔夠奶量唯有俾多幾個你啦;
肥仔,你控制慾強,呢種Model級別又好有服從性嘅就滿足晒你喇;
至於你,顏控嘛,呢兩個都係出名靚樣嘅,睇樣都已經夠殺。
 
大家望住自己隻碟,有一種感動,連我阿媽都無咁清楚我喜好,連我老婆都唔會咁貼心,連我自己都無諗過自己會咁鐘意!
 
真兄弟,係熟到一種你唔講我都知我都明嘅程度。
 
望住隻碟,我突然意識到一個問題,我屋企已經無DVD機喇,Macbook更無碟機,咁我睇乜春?最後,幾條麻甩佬,用一部PS4播咗隻碟,達成咗人生一個成就,就係睇一套AV睇足全套,無Skip。
 
好難想像呢個畫面,有少少谷住谷住,又有少少唔好意思,一件咁私人嘅事竟然有咁多人參與,好彩大家無飲太多酒,唔係會發生咩事都無人知。
 
臨走一刻,我被人叫住咗,喂,你顏控嘛,特登買多隻俾你,樣靚身材正、甜美白滑長腿,啱晒你啦,淨係俾你一個咋,記得返去J爆佢!我拎喺手一刻,覺得,點解你要對我咁好啊BB,我無以為報唯有以身相許啦。
 
返到屋企,拎隻碟出嚟望望,突然間發現咗封面有少少唔妥……
 
屌你老母,真係夠兄弟啊!望望個封面,明就明,唔明就唔明,但我可以俾個keywords你。
 
「泉水らん」
 
蔣薇
www.fb.com/maydreaming

Read More
2018年09月28日

《煙的故事》

140614112585351
 
網上資料圖片
 
十個女人,九個唔喜歡男人食煙,淨返一個因為佢自己都食,今次我想講嘅係一個食煙男人嘅故事。
 
一個由中學已經開始食煙嘅煙民,每次佢返屋企都會將包煙放喺屋企附近嘅地方隱藏,有時食完煙,即刻要食香口膠,用漱口水,我哋成日諗,你點避都好,都肯定有味,唔食煙嘅人一定聞得出,唔通你次次都話落機舖或者朋友食咩?
 
佢話,佢老婆無講過佢食煙呢件事。
 
兩個方向,一係佢老婆蠢到無人有,所以一直都察覺唔到;另一個可能係,佢老婆一直都知,只不過係無出聲。
 
我哋偏向後者,一直都覺得佢老婆係一個有智慧嘅女人,點解?因為好多女人都嘗試去控制男人,唔比打機、唔比玩玩具、唔比食煙、唔比飲酒,我會形容係無腦行為,即使結婚都係,兩個人總有唔同習慣同過去,唔比,係最低級嘅做法,唔比得多,只會令關係有所變質,有邊個人喜歡被控制?
 
兩個人一齊都可以有自己生活同自由,你唔喜歡食煙,眼不見為乾淨,佢唔係你面前食,有做嘢去表示我知你唔喜歡,所以你面前就唔做,呢種係尊重,既然你做咗份內事,我就隻眼開隻眼閉啦。
 
但總有人喜歡將事情攤到出嚟,去刨根究底,最後總有一方要退讓,一有人讓,即係有人唔開心。
 
尊重,係對伴侶最重要嘅條件。
 
有兄弟偷食,做兄弟嘅唔會聖人上身,只會同佢講,要尊重,要識得返屋企,你喺外面點玩都好,都要扮吓,都要做樣,都要交差,如果你玩到通宵,然後同老婆講飲醉咗,邊個信?你連做少少樣都唔肯,連基本尊重都無,咁不如放生對方啦。
 
我唔相信愛情好似童話故事咁,反而係一場戰事,由無數衝突同掙扎構成,每個人都想世界和平,但世界從無和平過,只不過係表面平靜,暗中大家都做咗好多黑暗嘢,只要唔好觸及底線就唔會爆。
 
一支煙,唔需要任何一方妥協,我睇到嘅,係尊重,係愛。
 
蔣薇
www.fb.com/maydreaming

Read More
2018年09月21日

《不如認認真真打個飛機算啦》

images-1
 
網上資料圖片
 
朋友公司有一個女同事,年輕失婚婦人,大家八卦之間提起佢,對男人嚟講,有女性自動埋身,當然食咗先講,但食還食,喺公司食就會有後果,呢個女同事不久就被一眾女同事排斥,話佢姣西、話佢出賣身體。
 
朋友作為一個人夫,動唔動心?唔動,聽佢講話唔係佢杯茶,所以作為朋友身份,反而同呢位女同事相處得唔錯,起碼大家有碗話碗有碟話碟,有次佢終於講起佢俾其他女同事排斥嘅事,估唔到,佢係相當之豁達。
 
「我都想有人鍚吓,有人陪吓,我理得佢係邊個、係咩人,對我好咪得囉,我唔明班女人點解要咁講我,話我隨便,話我放蕩,喂,我想講,邊個食邊個,邊個有著數,邊個舒服呢樣嘢好相對,佢覺得食咗我,我又何嘗唔係覺得玩咗佢?點解一講到性,就好似女仔一定蝕底?」
 
朋友聽完無出聲,心裡面係認同佢講嘅野,但奈何呢個世界絕大部份人都會覺得佢錯。
 
明明係雙方雙向嘅行為,但點解一做,就好似欠咗女人咁?開房房錢一定係男人出?做完又要好好呵護對方安撫對方?甚至係,連女朋友,老婆都好,想要性,都好似要求對方,而對方仲要好似唔多願意,但勉為其難地答應?
 
對於性愛,唔好以為男性主導,係Metoo之下,女性可以佔有百份百主導權,唔比你就唔比你,你點講都無用,無mood、攰、工作唔順利都可以成為理由去拒絕男性要求,而一旦對方肯,你都要謝主隆恩,交手之時,大家可以無乜交流,點解?因為對手佢係被迫上陣,想有幾積極?你唔快少少完事嘅話仲會埋怨你啊。
 
有時覺得做男人都幾慘,自細睇日本大師級作品,裡面應有盡有,完全滿足男性所有慾望,但回歸現實,落差太多,有時心諗,返去睇片打個飛機仲輕鬆自在滿足,可以滿足到自己,又唔需要苛求,可以保留返少少尊嚴,亦唔需要睇人面色仲要得啖氣。
 
好記得一路向西有句對白:不如正正經經叫返隻雞算啦。
 
有時面對另一半嘅冷水,我都想講:不如認認真真打個飛機算啦。
 
件事如果唔公平,唔享受,唔對等,不如大家冷靜吓,諗吓到底做愛,係唔係一種零和遊戲。
 
蔣薇
www.fb.com/maydreaming

Read More
2018年09月14日

《講玩、講女、講食、講事業》

download-1
 
網上資料圖片
 
每個年齡層會有唔同嘅題材,細細個一齊講打開咩機,然後一齊玩,一齊分享攻略;情竇初開時,大家會傾暗戀邊條女,食咗邊條女,同女一齊,同女分手;再大少少,講吓去旅行,買衫買錶買車;到某個時間,大家Happy hour時會提起將來,講吓事業。
 
事業,講得太多,唔詳談,但可以講吓心路歷程。
 
點解大家會講少咗開心,講多咗生活?因為人大咗,生活嘅煩惱真係充斥好多時間,有幾多人因為生活唔再打機?有幾多人因為生活唔再溝女?有幾多人因為生活唔再玩太多?但人大咗,你會因為生活,而迫不得已咁放多咗時間落事業。
 
而呢個唔係個人改變,而係你身邊所有同齡人都係咁,大家一講,就有無盡話題,無盡悕憈。
 
男人比女人遲熟,但男人成熟起上嚟,可以好快,不經不覺,佢會熟咗,熟到你覺得陌生,有時女人要求男人成熟,但又接受唔到成熟附帶嘅一種冷酷,當一個男人唔講玩講女講食同你講事業,你覺得佢身上仲有笑容咩?
 
但男人講事業,都係充滿痛苦,有邊種事業來得容易?
 
點去行前,行去邊,無人講到答案,你要承擔所有壓力,就算同朋友傾同講,都唔會有人幫你,最後行嘅都係一條孤獨嘅路。
 
好似一個rpg遊戲咁,你行一條路打自己嘅怪,另一個朋友係隔離行自己嘅路,大家唔會幫到大家,只能令你心入面有種我唔係唯一一個咁痛苦嘅感覺。
 
一場酒局,係酒精同香煙嘅交集後,大家感受住苦澀同辛辣,或者,呢種就係人生嘅味道,男人成熟嘅味道,
 
或者,你唔需要咁沉重嘅都可以享受到你生活,咁大家睇嘅嘢唔同,我唔需要去說服你明,但明嘅朋友,就會明我講乜,篇文唔係俾你睇,唔需要太執著。
 
蔣薇
www.fb.com/maydreaming

Read More