2020年07月09日

《機舖的末落》

2020_07_09_May Menclub
 
網上資料圖片
 
最近因為要等人所以要搵地方Hea陣,見到有間機舖就諗住入去打陣機消磨時間,假日下午嘅人都係寥寥無幾,近乎七成機都變成馬機、老虎機同埋釣魚機,感覺似賭場多過似機舖……
 
仲記得中學時期,16歲先可以入機舖,當年一夠歲數就入去打機,每間機舖都會有種煙臭味,愈細愈臭,仲有好多入錢位放煙頭搞到膠都溶埋,而呢段打機嘅日子,都真係幾令人回味,唔係講陣煙味,而係一班朋友一齊打機嘅樂趣。
 
全盛時期機舖應該係二千年左右,當年銅鑼灣世貿、旺角麥記地庫、德福、奧海城等等大商場都會有機舖,而人流量真係極大,一班人諗唔到去邊,打機囉,坐低打嘅一班,喺後面睇又一班,仲記得當年睇人打機,見到一個連贏十幾場拳王,後面企成二十幾人都有,選手唔需要回頭都可以感受到一種仰慕感覺。
 
今日香港仲有邊度有大機舖?仲係做得住應該只有旺中地庫嗰間,細機舖執嘅執,轉賭場嘅轉賭場,原因係咩?電話可以打機,家用機又可以打機,電腦又可以打機,足不出戶都可以同全世界人對戰,點解仲要出去一間機舖同人打,仲有時無得打要排隊。
 
街機曾經有種特殊地位,比起家用機,你可以同好多陌生人打,面對高手坐喺你對面時,有種決鬥嘅感覺,輸嘅走,贏嘅留,好似一個擂台咁,當然我都見過好多打打吓變成真人快打,喺後巷打到爆缸都有,所以好多機舖都會用膠椅,鐵椅真係一打就見硬血。
 
當拳王、街霸都可以用400蚊左右屋企上網打時,幾蚊一場嘅機舖已經變成雞肋,喺一個咁差嘅環境,手制分分鐘又殘又舊時,點解我唔用私家機去玩。
 
或者我哋生活水平高咗,有邊個屋企無部遊戲機,就算無你都仲有電話啦,一蚊都慳返,有人會覺得,點解打機課金幾百幾千幾萬時,都唔願意去機舖玩,因為你俾幾多錢打,都無對手無觀眾。
 
空無一人嘅機舖,冷落嘅遊戲機,我入錢打返場吞食天地,三蚊,重拾童年回憶,一如以往,打到曹仁就gameover。
 
三蚊,以前打一場都要小心翼翼,依家打,都唔求贏喇,一路打,一路諗返當年坐你旁邊同你2p嘅人,今日已經唔喺度喇。
 
蔣薇
www.fb.com/maydreaming
IG:maydreaming1123

Read More
2020年06月22日

《讓男人變好的小技巧》

2020_06_22_May Menclub
 
網上資料圖片
 
每對情侶都總會有唔少磨擦同分歧,例如掛住打機,食煙飲酒等等不良嗜好同生活上壞習慣,試問世上邊有完美嘅伴侶,最常見嘅兩種處理方式不外乎係,忍同鬧。
 
呢兩個方法當然係鬧出唔少悲劇啦,忍同鬧,即係點都有一邊會受到傷害,最近我聽到一個故事,想同大家分享吓除咗忍同鬧之外嘅另一條路。
 
有朋友佢有食開煙,當然佢女朋友唔太喜歡啦,為咗呢個女朋友,佢決定食埋呢包煙之後就戒,一包二十支嘅煙,每次佢唔開心都會拎一支出嚟食,即使係咁,二十個quota都好快用完,佢包煙放咗喺櫃,有日做嘢唔開心佢打開櫃想食埋最後一支之時,都好掙扎,忍住咗無食,因為佢覺得係人生之中最後一支煙,想搵個適當時間先食埋佢。
 
點知有日打開櫃時,佢發現咗包煙竟然係新嘅,舊嘅唔見咗,而佢自己一個住,唯一會上佢屋企嘅就只有佢女朋友,除非係有賊,而個賊唔偷之餘仲放低咗包煙。
 
有日佢鼓起勇氣問佢女朋友係咪佢放低,女朋友無講乜,只係講咗句唔好食太多就得。
 
呢一秒佢所有食煙嘅衝動都無晒,仲差少少喊出嚟。
 
聽完呢個故事之後嘅兄弟們都感嘆,男人真係受軟唔受硬,生活太苦,所以先會有咁多壞習慣,無論打機食煙定飲酒,都不過係發洩同求開心,好人好姐又點會咁呢……
 
當一個男人佢好苦時,仲要被迫唔準咁,只不過係解決咗個人,無解決個問題。
 
好多時男人都願意去改變,因為佢愛對方,但佢需要嘅,唔係一種奉旨,你唔食煙係正常,只不過係將負分變成零分,每次男人一感覺到呢種零分嘅心態時,都會死灰復燃,最多係偷偷地唔比佢知。
 
但當男人付出時,你一種關心,就已經滿足晒佢嘅空缺,佢已經唔需要再用壞習慣去發洩了。
 
正所謂你敬我一尺我敬你一丈,但更多人選擇用敬酒唔飲飲罰酒。
 
最後我哋問咗佢一個問題,你仲有冇再食煙啊咁,佢笑咗笑,拎咗包煙出嚟,全新未開封。
 
蔣薇
www.fb.com/maydreaming
IG:maydreaming1123

Read More
2020年06月05日

《打機贏係咪咁重要?》

2020_06_05_may menclub
 
最近有個唔太熟嘅前輩突然問我有冇玩某隻遊戲,我話有,都玩咗好幾年,呢款遊戲係打技術,課金都只係求美觀,真正落場係要靠實力,而佢有錢,平時係玩課金以萬計嘅手遊,突然見佢玩呢款遊戲我有少少驚訝。
 
然後佢問我可唔可以帶佢玩,話晒識我都唔會拒絕,一睇佢數據係好好,勝率有六成以上,但睇佢真係全部都係搵人帶佢玩,唔係自己玩。
 
一打落去我就明,佢技術唔太好,連好基本嘅概念都唔太識,我帶佢打真係打得好吃力,如果我失誤就基本上唔可以靠佢贏。
 
我不禁反思到底佢玩遊戲係為乜,贏係贏,但唔係贏自己,而係靠隊友勁,輸又係害埋人哋扣分,每晚佢都叫我,我得閒就應酬佢兩場咁。
 
成年人打機,真係好易呃,因為反應慢咗,又無咁多時間去練去理解遊戲,課金遊戲可以令佢哋得到勝利,但只係一種金錢壓制,有錢過你嘅人太多,你鬥有錢?我曾經識過一個廣西富二代,佢話唔駛做,每日打機,每日課最少一萬,同佢傾多幾句佢話去廣西可以搵佢,仲話包食住玩,我心諗係咪好似暴龍哥咁,打死人只要唔太出名嘅都無事咁。
 
因為見到呢種無限金錢嘅人,我棄咗遊戲,轉咗玩技術為主嘅,但就算係技術流,你都可以俾錢請人帶你打,包贏先收錢,而呢個世界就係咁運作。
 
課金我都得,唔可以多,但總有一班無課金嘅人你可以玩到佢哋死,但我無,或者我仲保留住玩遊戲嘅初心,享受一種挑戰同未知,而唔係純粹想贏。
 
贏係快樂,但係過程入面你點樣面對逆境,面對挑戰,最後即使輸都無辦法,睇返回放,諗吓輸乜,如果點點點頭先就可以贏等等,我進步緊。
 
好多時輸,我都會唔開心,但比起輕鬆地贏,我更想係遊戲入面面對困難,迎難而上,好似熱血漫畫咁把握機會反勝。
 
我問佢,佢點解會玩呢個遊戲,佢話因為多人玩,想跟下潮流,我聽完,不禁諗起今日仲有玩Pokemon Go嘅中年人,佢哋唔係玩潮流,而係真心喜歡,享受緊遊戲樂趣,喺規則同困難之中堅持。
 
贏係重要,但點解會贏,更重要。
 
蔣薇
www.fb.com/maydreaming
IG:maydreaming1123

Read More
2020年05月26日

《青春流過的淚水》

2020_05_26_May menclub
網上資料圖片
 
有人問過井上雄彥點解唔寫到湘北隊拎到冠軍,佢答因為青春都應該係留有遺憾嘅。
 
男兒當入樽之所以係神作,或者就係佢擁有一個不完美嘅結局,所以年紀愈大睇愈覺得感受甚多,對於好似足球小將啊,黑子的籃球啊,光速蒙面俠,網球王子呢種既誇張,又好似戰鬥漫畫咁愈打愈勁,打完全國又要打全世界,差在未大戰外星人嘅漫畫,真係覺得好攰。
 
或者年輕時,大家都會追求完美,追求幻想,追求熱血,仲會覺得人生係有無限可能,唔到最後都唔應該放棄,有機會贏,會贏,一定贏!
 
但現實世界,有邊個係不敗,最強嘅西班牙都有日會落敗,巴塞亦唔係永遠嘅王者,今日你係主角,聽日人哋就係主角,我哋學識勝負乃兵家常事,人生唔同遊戲,你要完美可以save and load,但人生無得重來,唔通你一輸就斬掉重練咩。
 
我曾經喺中學運動會,特登去搵一個無乜人玩又極易贏嘅項目去玩,最後贏咗,但心中嘅喜悅其實唔大,贏係咪咁重要,為贏而贏去迴避失敗,今日睇返轉頭,覺得同呃自己無分別。
 
反而我記我最深刻係當年一場班際比賽,明明實力覺得唔錯,而自己都係主力,最後比低一級嘅人屌打,打到最後,我已經發脾氣唔想再打落去,然後師弟走埋嚟同我講,贏輸都要盡全力打落去,最後我喺更衣室忍唔住喊咗出嚟。
 
人生唔同漫畫,人人都可以係主角,唔係你一個人努力,唔係你一個人在意,可以做嘅,就係盡全力去令自己唔好後悔,輸同贏背後太多因素,人哋可能比你努力更多,比你強更多。
 
呢次嘅淚水,當年嘅隊友都久唔久拎出嚟講吓,而我都會話,喺球場上面喊過,都真係不枉此生,因為我在意,我努力過先會喊。
 
而呢年係我form7嘅比賽,已經唔可以再嚟一次了,亦成為青春嘅遺憾。
 
今日,我已經唔會再喺球場上面流淚,因為我已經唔再在意太多,輸又好,贏又好,都係當友誼波,成年人嘅淚水,太罕有,因為唔青春嘅你同我,已經因為生活同工作被磨滅咗其他追求。
 
但最重要嘅一點係,我哋都知道今日做乜都好,青春都已經唔再存在,同你一齊打波嘅都唔再存在,偶爾係WhatsApp同酒局中講返從前時,只能回憶。
 
蔣薇
www.fb.com/maydreaming
IG:maydreaming1123

Read More
2020年05月15日

《三文魚好尊重日本女優》

2020_05_15_May Menclub
 
網上資料圖片
 
網上流傳好多趣事,其中有蔡瀾先生提出日本人唔食三文魚,同埋網民提出日本人好尊重日本女優,呢兩個傳聞真係幾乎每日都被人笑,最後演化出三文魚好尊重日本女優嘅合成體。
 
日本女優值唔值得尊重?本人認為職業無分貴賤,人生中只有三套正版AV,其餘都係網上睇同BT Download,幾多子孫係因佢哋而死,我已經記唔清,但最低限度,佢哋服務過大家,而大家亦需要佢哋,點解可以唔尊重呢?
 
收錢,拍片,睇片,打飛機,呢個係一個定律嚟,試想想無女優的話,大家只可以靠自己幻想,呢種係大功德,你同我都受惠過。
 
但事實係,大家又要睇,又要站喺道德高地上面批評出賣肉體嘅女優,無市場,何來供應呢?
 
既然因為錢而拍片嘅女優都應該尊重,咁阿嬌呢?
 
最近阿嬌離婚,大家都用作茶餘飯後討論,不外乎咩,好好地一個醫生又靚仔,點解要娶一個被世人都睇過晒嘅女星?離婚都係好事,呢個女人唔值得等等。
 
講真,人哋點解離婚,呢個係家事,我唔評論,但我想再問一次,阿嬌佢做錯咗咩?
 
當年阿嬌單身,陳冠希亦係單身(如有錯請指正),正所謂男未婚女未嫁,傷害咗邊個?作為受害者嘅阿嬌佢除咗好傻好天真之外,比人拍攝低最私密行為,呢個唔係法律問題,更唔算係咩道德問題,但無人可憐佢,往後咁耐,都總有唔少人提完又提,向受害者施暴。
 
人總會成長,亦會成家立室,佢結婚,我恭敬佢;佢離婚,我亦替佢可惜,但作為一個局外人,不停揶揄佢,我唔敢話係黑心,但一定無惻隱之心。
 
網上世界,好多人講一套做一套,你睇相時,係用咩心態去睇,睇完就算啦好心,睇完仲要唱,比起一班趙完唱嘅人,你無食過,只係好彩俾你睇到,然後你就用呢個痛處去不停施虐。
 
回望一睇,當年嘅道德水平都幾高,一對男女情投意合影私房照不幸流出都要比人鬧成咁,呢十幾年,安心偷食,小豬出軌等等,佢哋呢個行為真係傷害咗身邊嘅人,亦係自作自受。
 
但問返一句,阿嬌佢做錯咗咩?
 
當年,我都有份笑有份講,睇返都覺得年少無知,咁多年,大家成熟,仲需要再講落去嗎?俾返少少修養,俾返少少體諒吧。
 
蔣薇
www.fb.com/maydreaming
IG:maydreaming1123

Read More