2015/02/18

男人的壞嗜好(十二)《男人?唔係睇樣嘅咩?》

 

 

20150218 蔣薇 MenClub_男人唔係睇樣嘅咩_1 20150218 蔣薇 MenClub_男人唔係睇樣嘅咩_2 20150218 蔣薇 MenClub_男人唔係睇樣嘅咩_3

得罪講句,有邊個男人唔係睇樣?

 

應該話,人類不分男女,都係樣子協會成員,呢個道理我細細個睇《Yes!》校花校草選舉已經知道,最多人追,永遠都係比較靚嘅女同學。香港小姐都係以美貌與智慧並重,睇先後排列都知,美貌前於智慧。

 

內在美再多,無外在美去吸睛只會埋沒。

 

中學老師對我哋嘅字同格式著緊到一個病態嘅程度,有日一個外校生忍唔住抱怨咗兩句寫得再好、再整齊又點,內容可以就得啦。老師講咗個例子:「超級市場裡面嘅罐頭內容一樣,但留在貨架上面嘅永遠係有凹陷的。」

 

對於內在,一日我地唔打開,一日唔詳細品嚐你都唔會知道,舉另一個女性常用嘅例子:靚仔有機會出軌、醜男都有機會出軌,咁當然揀個靚仔啦,出軌個吓都無咁傷。

 

睇樣,可以話係人之天性。

 

假設,有兩個一樣性格嘅人,一個靚,一個醜,揀邊個?That’s not a question!可惜,世界無咁Simple,而人類係Naïve,我地不斷糾纏在外在美與內在美之爭中。

 

中學時稍為靚少少嘅,都係臭串的,女神?只係存活在毒男幻想之中,一個既有內在,又有外在嘅女仔唔係無,但佢會唔會揀你?你先要掂量掂量自己的條件。而大部份嘅少年都係太年輕,係外在與內在的天秤上,往往傾側於外在上,得出嘅結果當然唔好。

 

人類總要重覆相同錯誤,我地唔信邪,領完一次又一次嘅野,終於清醒,拍拖係需要一個性格好,你可以相處到,相處得開心嘅人,而靚唔靚已經好其次(當然你比個如花問我食唔食,我唔會答你呢種低級極端小學雞問題啦)。

 

睇樣絕對係男人嘅壞嗜好,呢種嗜好傷得幾次身後,你都唔可以唔認自己時日無多,亦再無心力去承受另一次的失敗,最後你係婚禮上親吻的,我唔敢講係最靚嘅選擇,亦唔一定係最愛嘅人,但一定係令你感到最幸福嘅。

 

最後,我地終於發現,睇樣還睇樣,拍拖還拍拖,結婚還結婚,三樣嘢係獨立嘅。你唔難發現上年紀嘅男人唔再望屋企嗰個,反而喺街度肆無忌憚地由頭Scan到落腳,你或者會問,咁屋企嗰個點好?

 

我話你知,屋企嗰個,唔係用嚟睇, 係用嚟愛嘅。

 

圖片來源: 互聯網

 

蔣薇Facebook Fan Page:

www.fb.com/maydreaming

 

 

COMMENT