2015/04/08

男人的需要(六)《機中自有黃金屋》

20150408 蔣薇MenClub 1
 
細個我好沉迷打機,一部Gameboy四粒金霸王就打半日,二十粒裝一個周末就用晒,當時打機算係我第二生命,但我從來無後悔過用讀書時間去打機。

 

有日同未婚妻傾起歐洲地理,答咗佢幾條問題之後,佢問咗我一句,你以前Geog好勁?

 

我答:其實地理嘢我係打機學返嚟。
 
20150408 蔣薇MenClub 2
 
想當年,有一隻Game叫《大航海時代》,扮演歐洲貴族、海軍、海盜等等角色,嗰陣我學識咗歐洲國家首都,大約喺咩位置,讀Geog嗰時買嘅地圖,上堂都唔用,唯獨是打機時會拎出嚟搵國家位置。

 

打機,教咗我咩叫黑死病,亦令我知道鎖子甲係點,知道要橫跨大西洋有幾困難,三角、四角航係順風逆風時嘅不同,砂糖、甘蔗、象牙、咖啡豆、茶葉等等喺邊出產。

 

最近亞視宣佈死亡,我諗起當年玩過一隻經營電視台嘅Game,對收視率,咩時間要播咩節目,連續劇同單集電影,每段時間收看觀眾群,點先拍到拎獎戲,點先拍到師奶劇明瞭如指掌,個時我學識睇報表,睇研究,唔係隻Game玩唔到落去。

 

學習隱藏係生活之中,有人認為睇書先叫學習,而我認為你有心學嘅,打機都學唔少嘢,唔單止係學硬知識,仲會學識做人,玩金庸群俠傳你會知道做好人做壞人係自己揀,每個玩家開始都係一樣。故事開展,多數都係恩怨情仇,舊Game好老套,永遠都係講因果。
 
20150408 蔣薇MenClub 3
 
只可惜,今時今日嘅遊戲往往都只係追求畫面、系統,以前造Game嘅人肯定睇唔少書,亦經歷過人生高低,佢地好願意經遊戲去分享佢地識嘅嘢,反觀依家呢一代,追求緊張刺激,有深度,有內涵嘅遊戲愈來愈少,免費Game一堆任你玩,不過都係迫你課金,引你比錢,用錢去解決問題,用錢去壓倒一切,呢種感覺我唔鐘意,退一萬步講,唔計你課金,值得我去玩嘅又有幾多?
 

可能我老喇,已經再提唔起勁去打機,總係覺得依家嘅Game無癮,寧願下載舊Game重拾昔日感覺。
 

圖片來源:互聯網

 

蔣薇Facebook Page:

www.fb.com/maydreaming

COMMENT