2015/04/30

男人的需要(九)《男人最愛18歲》

181
 
十八歲,卜卜脆,有句名言,無論男人二十歲、三十歲、四十歲定五十歲,最愛始終係十八歲的青春少艾。
 
以肉體而言,十八歲當然是最好,正如十八歲嘅你仲係精力旺盛,如果你打算拍吓散拖,或者需要一個性伴侶,十八歲是最好選擇。
 
有巴打話,同十八歲妹妹拍拖,佢哋物質慾無咁重,亦唔會問你有冇車有冇樓,唔駛煩結婚,平時食個麥記都滿足,同青春少艾拍拖會令你重拾青春初戀的感覺,聽落好好,但正如你買車時個Sales一樣,背後部車有咩缺點,又點會提?真係買咗你就會知道係咪真係適合你。
 
當你帶著個青春少艾出去朋友聚會,大家都事業有成,傾緊結婚、買樓、股票、旅行話題嗰時,佢先剛剛考完DSE,唔好話要搭嗲,如果佢唔識唔出聲都還好,搵著個MK妹,佢真係分分鐘講句嘢得罪全村人;有時你放工好攰,或者比麻煩老闆留難,佢亦唔會比到咩支持你,因為佢根本唔明白你嘅世界,更唔好講你童年回憶,成長環境,你睇嘅卡通片佢分分鐘連星矢係咩都唔知。
 
兩個人一齊除咗肉慾之外,心靈滿足亦好重要,差唔多年紀嘅,佢地話頭醒尾,你可能講一句,佢已經知道背後嘅意思,原因好簡單,相處,係需要經歷,拍過幾次拖,分過幾次手,成年人開始明白自己需要嘅係咩,亦會明白對方嘅心態,大家都從感情崎嶇之中越過、跌過、痛過、哭過。就好似兩個人嘈交,佢唔再嘈反而緊緊抱住你,一切當無事發生過,可能係經過幾十次同佢前度爭吵之後的智慧。
 
講得出男人永遠都喜歡十八歲嘅,佢只係停留係用下體思考嘅階段,二十五歲開始,你會發現愛情、性愛都只係人生的一小部份,對於男人,事業、夢想、見識、朋友、家庭會慢慢變得重要,十八歲滿足到下體,卻滿足不到其他。
 
十八歲,只係一種幻想,幻想總是美好的,沉溺在幻想之中,往往係一批唔成熟嘅人,佢地根本唔清楚現實。十八歲,一班兄弟飲酒時FF下都仲得,真係拍拖?咪搞我。
 
182
 
圖片來源:互聯網
 
蔣薇 Facebook Page:

www.fb.com/maydreaming

COMMENT