2015/05/28

男人的需要 (十三)《失戀乃成功之母》

 

AM3 
 
撒亞人每次從死亡邊緣走過,回復後便會實力大增,我認為每個男人都係撒亞人,不過經歷嘅唔係生死,而係失戀。 
 
潛能永遠都係重大改變中激發,平時你想進步,想突破,但絕大部份人都會安於現狀,諗下你每日有幾大進步?可以話睇唔到咁滯,之但係失戀唔同,失戀呢種由心底湧出嘅悲痛,往往成為突破的關鍵。 
 
朋友A,佢本來只係一個平平無奇嘅男人,事業不上不下,但有一個穩定女朋友,直到有一日,佢發現女朋友有外遇,對象係一個事業有成嘅人,佢回想起有時女朋友會叫佢買車買樓,而佢總會支吾以對,人工加得少少,每年都會聽佢大叫公司差,轉工講咗三年都係轉唔到,直到有日,佢女朋友離開佢,坐上一架Aston Martin,三個月後仲訂埋婚,住喺一個600呎嘅單位後,佢無諗住再去追返人,因為佢一切都唔及對方。 
 
 

AM2

   
 
女人庸俗?有錢就跟?兄弟們當然可以如此解讀,但朋友A無講過一句佢女朋友嘅壞話,只係默默咁工作,轉咗一份比佢之前人工高三成嘅工,跳嚟跳去,終於搵到三萬幾一個月,雖然同Aston Martin差太遠,但佢已經唔再失禮。 
 
同佢傾計時,問過佢點解會咁有決心,佢只係搖頭講:「我可以唔進步,然後去搵一個理解我嘅女人,理解我,唔等於佢會開心滿足,更唔代表佢幸福,如果我搵到個唔會介意我人工同財產嘅女人,我更要令佢有更好嘅生活,而唔係同佢一齊捱苦。混混噩噩咗咁多年,係分手之後我先發現,原來自己可以做得比以前更好!」 
 
悲痛,可以化為力量,為嘅只係唔再重覆犯錯,為嘅只係唔想再次失去。 
 
有人喺家人離世後改過自新,有人喺傾家盪產後發奮,有人喺生死邊緣遊走後頓悟。 
 
比起以上三種,失戀算小兒科。 
 

有人話:失戀是為了尋找更好的人; 
 
前提係:失戀後你也變成更好的人。 
 
 
AM
   
 
圖片來源:互聯網
 
蔣薇 Facebook Page:
 
www.fb.com/maydreaming

  

 

COMMENT