2015/07/16

男人的需要(二十)《男人需要拋妻棄子》第二回

追女仔

 

男人步入中年,好多後生時都唔會點理嘅事,依家迫住唔到你唔理。
 
「喂,唔飲甜,唔飲凍,代糖都好無益,幫我買兩支大津路得喇……」阿健竟然學人講健康。
 
大佬發笑淫淫咁講:「估唔到你都幾識保養喎,但係點解你都仲係咁肥嘅?」
 
「你識條鐵咩,如果飲甜飲凍,分分鐘佢再肥多一截!」阿Kent搭口話。
 
阿標就好同意:「其實飲甜同飲凍對身體真係唔好,你睇吓一支可樂,有三分一都係糖,同埋人嘅內臟好怕凍,飲凍嘢你身體會喺內臟積聚脂肪,大肚腩就係咁形成!」
 
大佬發哼咗聲:「問題根本唔關飲唔飲凍嘢甜嘢事,想當年我哋一齊打波,珍寶裝自由斟大大杯可樂飲兩三杯咪又係鋼條身形!」
 
阿健無奈話:「大佬,今時唔同往日啊,依家新陳代謝慢,同埋有幾可做運動啊……」
 
「挑,講真,呢樣就住就住,嗰樣又唔做得,咁人生仲有咩樂趣?我唔理,今次出嚟聚舊,幾條麻甩佬唔通揸住條烏龍茶,食住餅乾,吹兩咀十一點前乖乖瞓覺咩?屌,唔好人未老,心就老啦!再過幾年,係咪要去公園耍太極,捉象棋啊你老母!」大佬發將所有健康飲品丟晒,然後將裝咗幾樽可樂、威士忌、伏特加,然後一包又一包魷魚、薯片、花生,總之有咁唔健康得咁唔健康嘅都放晒落去。
 
阿Kent望住打個圓場:「難得今次咁齊人,放縱吓啦兄弟!」
 
放縱?或者做得人太耐,都開始有規有矩,即興?無!亂嚟?無!有咩事早一個星期大家約好傾好先,去個旅行都永遠約唔齊人。
 
有時諗起當年自己老豆,每日準時七點半返到,十一點就熄燈訓覺,都唔覺佢會有節目,什麼時候開始,我們愈來愈像當日的老豆?
 
超級市場俾錢埋單時,大佬發突然蛇頭鼠眼咁頂一頂大家:「喂,九點鐘方向。」
 
唔同後生,後生仔都仲有少少怕醜,不過社會經歷多咗,可能俾老闆屌得多,臉皮已經今非昔比,幾個麻甩佬竟然眼金金直接望實。
 
難怪嘅,對方係四個妙齡少女,年齡似係十八廿二之間,一個著住T-shirt熱褲串串貢嘅MK妹;另外一個ABC型女神頭,露臍之餘仲配搭住一條修腰修腳牛仔褲;仲有一個One Piece長裙,有一種仙子Feel嘅青澀少女;最後一個留短髮,著住一件短袖恤衫,短褲,踢著對涼鞋嘅TB。
 
「四打四,剛剛好掛。」大佬發不懷好意咁講。
 
「算吧啦阿叔,同人哋差唔多爭咗十年啊!幫手拎嘢啦!」阿Kent雖然都覺得好養眼,不過這些機會不是屬於我的,望吓已經好開心。
 
呢度結咗婚嘅阿標同阿健,亦早已經係一個老公老豆格,望吓都會嘅,望完?然後呢?返屋企囉!
 
幾條麻甩佬帶著一股麻甩心,一齊走咗去巴士站等巴士,點知一路上竟然見到剛才嘅四大美人同自己同一班車。
 
「發達喇,話唔定我哋同一座渡假屋!」大佬發仲未死心。
 
「好心你咁大個人就唔好咁多性幻想啦!一陣你諗太多,夜晚無處發洩,搞埋我咁點算好?」阿健笑道。
 
「喂,機會,係要自己爭取嘅!四男四女咁嘅組合,明顯拍緊精裝追女仔2015啦!」大佬發淫笑道。
 
「係似精裝追女仔喎,大佬發你明顯就係咸蟲陳百祥,阿標就似矮仔曾志偉,阿健就應該係發福劉德華。」阿Kent一邊講一邊笑到肚痛。
 
阿標諗兩諗,一臉鄙視話:「你唔係想講自己係發哥嘛?」
 
「佢係發哥?我有名叫大佬發,明顯我至係發哥啦!阿Kent你條友仔上次㩒
鐘仔比我撞到,你先係陳百祥啊!」大佬發不甘地道。
 
每個男人都有好多面,平時最常見係工作面,好似阿Kent咁,佢做差人,平時一臉正氣,工餘時間㩒鐘仔,係佢另一面;阿標係普通公務員,做嘢有板有眼,跟足程序規矩做,平時笑容都欠奉;阿健就係做教師,為人師表更唔容許佢唔正經;大佬發就做偏門,面對幾個中學同學,佢先會笑笑口,如果對住手下同敵人,佢從不心軟。
 
不過幾個麻甩佬聚埋一齊,令佢哋重拾返當年渾渾噩噩嘅歲月,或者只有當年嘅同學,先會令你可以放心去展現另一面,毫無防備嘅一面。
 
嘻嘻哈哈之時,車已經埋站,唔知係咪念力發動,真係俾佢哋講中,幾個女仔都係同站落車。
 
「唔係咁邪啊嘛?」阿健驚訝地道。
 
「有冇聽過一個故事,從前,有個信徒面對洪水,然後有一隻橡皮艇嚟救佢,信徒話,主會拯救佢;然後一隊直昇機救佢,佢都好堅持主會拯救佢,然後佢死咗去質問主,點解我咁相信你,你都唔救我?神話,我已經前後派咗幾隊人去救你,係你自己拒絕咗咋。你哋明唔明呢個故事嘅意義啊?Signal啊!呢個就係一個Signal!係神俾我哋嘅恩賜,要珍惜啊!唔係會俾雷劈㗎!」大佬發開始妖言惑眾。
 
阿Kent好冷靜咁講:「如果係同我哋同一座,咁我就信喇!」
 
大佬發反駁說:「不要挑戰神!」
 
說時遲那時快,幾個女仔行咗同佢哋相反嘅另一面。
 
「嗱!睇吓你嘅Signal啦!Signal話你知,向左走向右走啊!」阿標笑到肚痛。
 
大佬發望住幾個妙齡少女嘅身影,愈行愈遠,每一步都打擊住佢嘅心,最後佢深呼吸咗一啖,然後話:「跟我嚟!」唔俾其他人有反應,佢就跟咗上去幾個女仔嘅路上!

 

追女仔2

 

圖片來源:互聯網
 
蔣薇 Facebook Page:

www.fb.com/maydreaming

 

COMMENT