2015/07/30

男人的需要(二十二)《男人需要拋妻棄子》第四回

 1
 
本是一個陽光明媚的周末下午,一排白色的渡假屋中,裡面有少男少女嬉笑、有老夫老妻重遊舊地、有生意失敗猶豫緊燒唔燒炭嘅中年人、有買咗套想脫離處男處女嘅小情侶、有一班青春無敵嘅女大學生。
 
仲唔少得四個年近三十嘅麻甩佬。
 

四個麻甩佬,有拋妻棄子嘅好好先生、有發福的前少女殺手、有由正變邪嘅乖乖仔、仲有一個由始至終都係仆街嘅仆街。本來佢哋只打算入個Camp享受男人嘅浪漫,飲住青島,食住條燒到燶晒嘅廚師腸,想想當年風光嘅日子,不過命運就好似女人發脾氣咁,來無蹤,去無影……
 
一屋寧靜,渡假屋如常地殘殘舊舊,放新傢俱怕你班粉腸整壞拎走,只係有一張唔知有幾多對情侶打個野戰嘅沙發,一張有返咁上下年紀嘅木枱,一部失傳以久嘅大牛龜電視。
 
四面牆,四條佬。
 
「咩事啊!大家係咪精蟲上腦,屌,用三千八租間渡假屋?無撚嘢啊嘛?」
 
打破寧靜嘅人,估都估唔到,就係當時堅持要媾女嘅大佬發。
 
「明明係你……」阿標係唯一一個仲有氣去應佢嘅人。
 
「你唔㩒住我?」大佬發明顯仲想推卸責任。
 
「算啦……依家討論責任都無謂,不如落去睇吓個發仔可唔可以退錢啦,部份都好啦。」阿健準備息事寧人。
 
「個死仔包會退錢?分分鐘佢又放狗咬人啊!」大佬發諗起企起身同自己差唔多高嘅比特犬就驚:「喂,阿Kent,你係警察嚟喎,交俾你處理啦,相信佢唔敢放狗襲警啩!」
 
阿Kent食住煙,懶有Style咁話:「今日我Off,唔會動用自己職權。」
 
阿標嘆咗口氣:「既來之,則安之……幾千錢當跌咗算啦……」
 
「兄弟們,換個角度諗,對面四條女都叫近水樓臺啦,行出行入都望到,當係比錢買視覺享受囉。」阿健安撫住大家情緒,再咁落去好好地一次旅行就變成埋怨大會。
 
「三千八買視覺享受……范冰冰都唔值啦……」阿標一家大細靠佢養,政府工收入穩定,但都唔算豐足,要佢用成千銀昅女?佢發夢都未試過。
 
「范冰冰又唔止三千八嘅,算啦,過去嘅就由佢啦,大家開開心心去Camp咪幾好!」阿健自己都覺得呢三千八好無謂,但俾咗仲後悔咩。
 
「唔得!」大佬發突然大叫。
 
「呢三千八俾咗出去,我哋買到一個機會!我哋要珍惜!如果媾到女嘅話,以對面四條女嘅質素,絕對值得!兄弟們,頭先我承認自己迷失咗!可能俾樓下隻狗嚇窒咗,不過我返返嚟喇!」大佬發回復自信,衝勁十足咁講。
 
阿標同阿健無奈地搖頭……咩迷失咗啊……放棄精裝追女仔2015,好好享受下,休息吓先係正途啊!
 
阿Kent食完佢支健牌,終於開腔道:「你條肥仔發終於有句講得啱聽!」
 
「吓……阿Kent你唔係陪佢癲啊嘛?」阿標估唔到呢兩個勢成水火嘅人竟然企埋同一陣線,睇嚟女人真係可以令一個人轉性,仲令呢對仇家和好。
 
「哈哈,好兄弟!」大佬發見到有人認同不知幾高興,打蛇隨棍上問:「嗱阿健阿標,對面就有四個高質女大學生,做人做狗,你哋自己揀喇。」
 
阿標耍手話:「客氣喇,我一家人都好幸福,唔駛祈福!」
 
阿健都附和:「女學生我學校大把,多謝先!」
 
「喂,唔好同我講呢啲,呢個世界有七成男人都想有豔遇!你哋唔係想做另外個三成嘛?」大佬發走埋去搭住阿標同阿健膊頭。
 
「哎啊,我哋就係淨返嘅三成啊……你放過我哋啦!」
 
「淨返嘅三成係希望有多次豔遇,恭喜你哋加入我哋嘅行列!」大佬發明顯有心陰佢哋,嚟一招霸王硬上弓。
 
久未發聲嘅阿Kent幫口話:「大家識咗咁多年,你哋兩個一個結咗婚生埋仔,另一個又有穩定女朋友,但係你睇吓我同大佬發,仲係孤家寡人,我敬重你哋面對美色而無所動嘅品德,不過我哋四個人一齊嚟,無理由我同大佬發去媾女,放低你哋兩個格劍咩?更何況,對面四個女仔,大家都踢過波都知道,二打四,喂,雙拳難敵四手啊!你哋去助一助拳,我又唔係叫你哋射門,只係幫我哋拉開兩個防守球員,同你哋無衝突喎。」
 
「屌,讀過書真係唔同啲,講嘢都有說服力過人嘅!哈哈!」大佬發見阿標阿健都好似考慮緊,就知道呢次四男大戰四女終於成行。
 
保守派阿標都係有少少擔心問:「你哋有咩計劃先……我哋要協助咩啊,媾女我唔識㗎喎……」
 
唔問由自可,一問,其實大佬發都未有咩計劃,呢一問令成個氣氛再次陷入疆局。
 
有人話,智者係因為有嘢想講而講嘢,蠢人係因為想講而講,明顯大佬發就係蠢人一類,雖然大佬發撈偏,俾錢媾女、上大陸、入歡場佢有無數經驗,但真係落場堂堂正正媾女,佢可以話同初學者無分別,無它,樣佢又無,身型佢又無,學識佢又無,除咗錢之外,佢就只係一個老粗,仲要係一個爛口又猥瑣嘅老粗。
 
「不如過去問可唔可以一齊玩……」大佬發思前想後,竟然諗出一個連自認唔識媾女嘅阿標一聽都知死硬嘅方法。
 
「發哥!如果你係周潤發,我對你呢個方法絕對舉腳贊成,不過你照照鏡,極其量你只係好過劉皇發咋!」阿Kent本來都想撐大佬發,只不過呢個提議實在太太太不堪喇,佢忍唔住放自己盟友一支冷箭。
 
大佬發雖然平時牙擦擦,但對朋友佢嘅臉皮就會變得非常之薄:「屌,咁撚叻你哋諗埋佢!」
 
阿標見到大佬發個落泊樣,都唔想再打擊佢:「講媾女點少得當年嘅情聖阿健!」
 
阿健聽到自己個名呆咗一呆:「我收咗山好耐喇,更何況以前我靠個樣搵食,女根本唔駛媾,自動就撲埋嚟啦……」
 
幾個男人最後得出一個結論,亦係佢哋能力內最行得通嘅一條路──扮偶遇!
 
卒之佢哋企咗係樓下等,班女去邊,佢哋就扮去邊,然後搵機會傾下計,再一齊玩。
 
幻想總是美好,現實卻是殘酷。
 
陽光晒住佢哋差唔多半個鐘,班女仍然少少動靜都無。
 
「阿叔,你哋企係度,擋住我做生意啊。」發仔用一個鄙視嘅眼神望住佢地。
 
「話時話,你好似話有一千蚊可以買嘢扣數喎,比四支可樂嚟先,我就嚟變豬肉乾!」大佬發份人最無耐性,人都特別熱。
 
發仔今次無串佢,順攤地拎咗四支可樂出嚟。
 
「如果等有用,呢個世界就唔會有人媾唔到女啦。」發仔埋首打機之餘,呢句嘢清清楚楚咁傳入四個熱到半死嘅麻甩佬身上。
 
「死仔包你講乜!唔好拉住我,唔好拉住我!我今日要比佢知道成人嘅可怕!」火遮眼嘅大佬發失咗控咁衝埋去,其他人捉都捉唔住。
 
不過佢衝到一半,突然發仔隻狗擋住咗佢,露出一口利齒。
 
大佬發未至於傻到咁,立即收腳叫:「唔好拉住我!唔好拉住我!」
 
發仔笑笑口話:「無人捉住你喎。」
 
大佬發一擰轉頭就見到另外三條死仔已經逃離現場,搞到佢依家進退失據。
 
「阿叔,你嚟媾女嘅,唔係嚟打交,見你哋咁慘,我私人醒條好橋俾你哋,包你哋可以入到班女嘅門口。」發仔拎住支雪條,一副咬我食嘅樣。
 
難得有個下台階,大佬發即刻話:「如果你真係有好橋嘅,我就大人有大量同你前事不計!」
 
「五舊水,即磅即講。」發仔伸手道。
 
「五你……五舊水……小朋友,你要咁多錢做咩啊,做人要腳踏實地,唔好向錢看太多啊!」大佬發監生吞咗句粗口,佢面對呢隻妹豬,真係唔敢得罪發仔太多。
 
「阿叔你理我,總之五舊水,要就算,唔要嘅唔好阻住我打機。」發仔完全唔在乎大佬發嘅情緒。
 
阿標聽到忍唔住話:「我哋之前有一千蚊可以扣數,扣咗佢得唔得先?」反正呢兩日都用唔晒筆錢,不如買個希望。
 
點知發仔遞出隻食指搖咗兩吓:「一千蚊只可以係士多消費,我呢個方法係用個人身份出售,兩樣嘢嚟。」
 
阿Kent睇唔過眼自己幾個朋友俾個小朋友玩,無臉嘅只會係大家,威脅話:「小朋友,根據商品說明條例,你頭先話包做到,如果你做唔到係犯法喎。」
 
發仔聽到犯法都無怕過:「我發仔話包你得,就係得,你班阿叔唔信?好,咁我就先俾橋,後收錢,你哋入到門口嘅我先收,如果你哋唔認數,我唔會告你哋,不過你哋就後果自負喇。」
 
「真係入到門口?」大佬發難以置信問。
 
「唔得嘅我以後跟你姓又點話。」發仔自信地說。
 
「殺你!」大佬發咬牙道。
 
旁邊嘅阿標同阿健發覺呢一幕似曾相識,好似剛剛先俾呢個細路屈咗三千八……大佬發都係一句「殺你」,點知比人割到一頸血嘅係自己。
 
發仔係櫃下面拎咗一盒嘢出嚟。
 
幾條麻甩佬都不其然好緊張,呢盒嘢散發出一種令人感到壓迫嘅力量。
 
「莫非係傳說中嘅淫賤不能移!!!???」
「會唔會係失傳咗嘅奇淫合歡散啊?」
「可能係2015年新出嘅等埋發叔喎!」
 
最後發仔一打開個盒,四條麻甩佬都虎軀一震,屌咗一聲!然後不約而同咁講咗句:原來咁簡單!
 
圖片來源:互聯網
 
蔣薇 Facebook Page:
www.fb.com/maydreaming

COMMENT