2015/08/06

男人的需要(二十三)《男人需要拋妻棄子》第五回

20150806 蔣薇 MenClub Column photo 2

圖片來源:互聯網

曱甴?

發仔拎出嚟嘅潘朵拉之盒,竟然藏住幾隻曱甴!

「嘩屌!」大佬發即時拋開個盒。

「估唔到你牛高馬大都會怕喎!」阿健笑笑說。

「怕唔怕同幾大份無關係囉……」大佬發死雞撐飯蓋道。

發仔唔再轉彎抹角:「嗱!一陣我會將曱甴放入班女仔嘅房,如果一隻佢哋都未至於驚,但呢度有成五六隻,相信佢哋再強都唔可以一次對待五六隻,然後你哋就英雄救美……我知,係老套咗少少,不過橋唔怕舊,最緊要受嘛!入到屋,救到人,然後點做,就唔需要我教啦!」

估唔到發仔人細鬼大,做事不擇手段,但呢種人如果係敵人,絕對可怕;係朋友,絕對可靠。

幾個人到中年又唔識溝女嘅阿叔,只可以採取呢個最可行嘅方案。

一班男人已經幻想到當班女大叫時,佢哋衝入去大叫:「有我哋係度!」然後班女依靠係佢哋可靠嘅胸膛之中嘅英姿,呢條橋,絕!

行動開始!

發仔警告如果係門口放,係非常可疑嘅行為,所以佢做人做到底,送佛送到西,佢決定放係廚房嘅渠口,等佢哋慢慢游上去,而班男人要做嘅就只有───等!

懷住一種忐忑嘅心情,幾個人心中哼住~啊~~哦~~啊~~哦誒!啊嘶嘚啊嘶嘚~~

呢種心情就好似小學去旅行一樣,有種期待,有種不安,有種焦急,有種牽掛!

「By the way,我發現咗一個潛在問題……」阿標係危急關頭,突然腦海清明。

「咩料啊,快講啦!」大佬發不安地道。

「我諗緊……我就驚曱甴……大佬發又驚……阿健阿Kent你哋應該唔會咁啱都驚嘛……」阿標笑笑口問。

點知不問由自可,一問,大家真係你眼望我眼。

阿標心中大驚:「唔係嘛……四個大男人都怕……喂阿Kent你係警察,點解仲會驚曱甴㗎!阿健你又係……成六呎高都驚……」

阿Kent冷靜說:「如果我有槍,我會毫不猶豫將曱甴殺死!」

阿健亦接著說:「我老婆唔驚,平時見到都係佢處理。」

四個大男人,竟然連曱甴都驚,原定計劃嘅致勝關鍵,竟然無人處理!一支可以殺死全世界嘅病毒,散播咗先發現無解藥。

說時遲那時快,對面房傳來幾聲高呼,睇怕曱甴大軍經已殺到。

阿標望住其他人,大家都諗緊踏唔踏出呢一步,須知道,英雄救美係愛情片,美救英雄肯定係笑片,一陣偷雞不著蝕把米就慘。

「上得呢個台就唔好怯!一怯,飛機就打成世!」大佬發明明係最驚嘅一個,但佢知道,佢呢世人,最光輝嘅,就只現在!

一馬當先!大佬發敲門問:有冇事啊?

聽到有救星,幾個女仔急不及待咁打開門。

其他男士見事到如今,要威就要快,阿Kent身材最標準,健美得來又有安全感,比起另外兩個中年發脹嘅朋友要強得多。

「小姐,你哋點解大叫啊?我係警察,呢個係我嘅Pass,有咩可以幫到你哋?」

其他人估唔到阿Kent竟然動用職業優勢,起碼對方會放下戒心,大家有機會入屋先。

打扮MK嘅少女即時打開門,見到一個警察係關鍵時刻來臨,即使唔係七色彩雲都照殺啦。

「有……有曱甴啊……屌……痴線嫁!」MK妹面上都充滿不安,曱甴或者是每個女人嘅死穴。

幾個男人終於成功踏入少女閨房,現場就只有打扮TB嘅少女苦苦頑抗,可能係TB嘅習慣,佢有種保護女生嘅本能,雖然睇佢眼神動作都有所顧忌,很大機會係都怕曱甴。

頂硬上,以人數優勢,幾個人齊心,信心都大少少,起碼有個伴先啦!

「小姐們放心,或者你哋帶我哋睇下邊度,曱甴,其實唔難。」大佬發笑笑口講。

「嘉嘉!做咩放班男人入嚟啊,佢哋仲危險過啲曱甴囉!」仍然拼死抵抗嘅TB同MK妹講。

或者男人天生同TB有種敵意,無它,因為大家係競爭對手嘛,男人媾女, TB又媾女,好難唔敵視對方。

大佬發更係其中表表者,雖然佢都怕曱甴,但面對一個TB嘅質疑,作為男人必須挺身而出,佢挑晒機咁講:「真的假不了,假的真不了。」然後掃視住TB嘅全身上下,明顯暗示你係女人就唔會係男人。

另外比較斯文嘅一個女仔就幫口話:「Chloe你唔好夾硬頂啦……你自己都驚……我相信幾位先生嘅為人,不如你就信佢哋一次啦……」

阿Kent亦即時衝出,拎住自己警察證證明自己唔係壞人。

某程度阿Kent張證都幾有說服力,班女仔都勸TB Chloe將曱甴交俾幾個男人。

但佢哋真係太天真,呢班男人不單止有不軌企圖,就連呢堆曱甴都係佢哋放入嚟,所以話知人口面不知心係真。

五六隻曱甴已經走到屋入面不同角落,佢哋一個女帶一個男分頭將曱甴殲滅。

係美人面前,曱甴可怕都要頂硬上。

事件如劇本進行,但悲劇……就係最開心嘅事候發生……

「死肥仔,你得唔得啊?」Chloe偏偏分咗同大佬發一隊,如果呢套係愛情電影,一個中佬肥仔,加一個TB,明顯係一對歡喜冤家嘅配搭,最後必定有情人終成眷屬。

之不過大佬發唔係咁睇,為人MK嘅佢,一睇就睇上打扮MK嘅女仔,雖然幫助一個女生重回正軌,為男人減少一個敵人,增添一個朋友,都係功德無量,但將孿變直,大佬發心諗自己過程中極大機會由直變孿。

「得唔得?男人無嘢唔得嘅!呢種道理你唔明㗎喇!」大佬發個心其實都十五十六,佢計劃見到目標後閉眼起勢咁攻擊,直到殲滅敵人為止。

「男人就係咁,明明驚都仲死撐,明明唔得又要扮得。」Chloe見到大佬發身體語言都感覺到佢唔係口講咁淡定。

「家吓你算點?我都唔知得罪你乜嘢,我哋住對面,聽到幾個女士有危險,我哋仆過嚟幫你,仲要俾你哋奚落?小姐,唔係,應該係先生,啊……都唔係,唔知叫你先生定小姐好,阿Chloe嘛?好人當賊辦,你修養好極有限啦!」大佬發義正詞嚴咁講,如果係一個斯文靚仔,效果應該唔錯。

另外三個男人都心諗,明明你個死肥仔就係撈偏嘅……明明你真係賊……明明你真係嚟媾女……明明最無修養嘅就係你條仆街……點解以佢肥胖嘅身型,企係道德高地可以咁高咁快呢?

Chloe一個女學生入世未深,講口才一定唔及大佬發,最後連其他女仔都被大佬發嘅吶喊感動,紛紛叫Chloe多一事不如少一事啦。

目標出現,或者留到最後嘅,先係真正嘅Boss,佢係一隻,飛,曱,甴!

如果曱甴係一級驚,識飛嘅肯定有十級驚,因為你唔知佢會選中誰係邊度降落,大家下意識都退後出房,只係留低原本負責嘅大佬發同Chloe。

大佬發再口硬,都對飛行物體有所避諱,大佬啊,臨時拉夫嘅佢無諗過要打大佬嘛。

「點啊,你頭先唔係好勇咩?」見到大佬發縮,Chloe當然唔放過單打嘅機會。

點知說時遲那時快,飛曱甴向住佢進攻,Chloe立即花容失色,雙手亂撥。

大佬發就笑得好開心:「點啊,有口話人無口話自己啊?你自己驚就唔好學人串啦!哈哈哈哈!哈哈哈哈!哈哈哈哈!哈哈哈哈!哈哈哈哈!哈哈哈哈!哈哈哈哈!哈哈哈哈!哈哈哈哈!哈哈哈哈!哈哈哈哈!哈哈哈哈!哈哈哈哈!

哈?

吓?」

大佬發笑緊嘅時候,覺得口入面飛咗異物入去。

「啊!!!!!!!!!!!!!!!!!!!!!!!!!!」一聲尖叫由Chloe口中傳出。

大佬發好似意識到咩,然後問:「隻……隻曱甴……去咗邊……」

Chloe就好驚咁指住大佬發,不過佢無出聲。

外面嘅人聽到尖叫都走入嚟睇咩事,見到大佬發同Chloe互相對指,尖叫聲,大叫聲一浪接一浪。

「佢食咗隻飛曱甴啊!」Chloe終於道出殘酷嘅現實。

「屌佢老母!!!」大佬發雖然都估到少少,但遠不及親耳聽到呢個現實一般震撼,然後佢就衝咗入廁所扣喉。

其餘男人諗起呢個媾女計劃第一步終於完成……之不過……付出嘅代價,實在是太大了……

蔣薇 Facebook Page:

www.fb.com/maydreaming

 

 

COMMENT