2015/08/13

男人的需要(二十四)《男人需要拋妻棄子》第六回

2

 

如果要你生吞一隻飛曱甴換來一個媾女機會,你制唔制?
 
可能你要考慮一下。
 
如果要你朋友生吞一隻飛曱甴換來一個媾女機會,你制唔制?
 
喂,隻曱甴呢?我親手「質」落佢個口度!
 
你問我今時今日香港最強演員係邊,一定唔係演藝界,而是警務界。
 
「發哥!!!!」阿Kent十級誇張地抱住大佬發,就好似下一秒佢就會離世咁款:「發哥你有冇事啊!???」
 
曱甴事故的始作俑者Chloe強忍嘔吐感,擔心地望住大佬發,無佢一掌拍落隻曱甴度,大佬發絕對唔會食得咁應。
 
阿標同阿健就無阿Kent演技精湛,笑到腹肌都出晒嚟,之但係佢哋就醒,人類總是重覆錯誤,佢哋笑嗰陣都掩實個口。
 
大佬發佢用手指伸入口搵嚟搵去,終於接受佢吞咗隻曱甴嘅事實。
 
「好喇,一天都光晒,大佬發你嘅犧牲係值得嘅,任務都完成了!」阿健心諗唔係我食,當然講得輕鬆。
 
阿Kent心入面盤算,本來一次拯救任務,只能勉強地同班女認識,但藉住吞曱甴事件,件事就唔一樣喇,依家佢哋唔單止欠人情,仲帶歉意,有巴柄係手,知道係佢哋入面最難纏嘅TB Chloe引起,之後如果佢阻頭阻勢,呢件事就係無懈可擊嘅武器。
 
一輪盤算後,阿Kent同大佬發打咗個眼色,大佬發都唔係蠢,一嘢就扮暈。
 
「發哥,點解你暈咗嘅!」阿Kent抱住大佬發條屍,啊,唔係,係佢肥腫嘅身軀大叫,呢個時候要拎著數就要誇張。
 
「點啊死肥仔,吞隻曱甴駛唔駛暈啊?幫你人工呼吸埋啊笨!」TB Chloe見到大佬發差劣嘅演技,忍唔住出聲。
 
作為籃球校隊嘅阿健當然要交出一個靚助攻:「小姐,你咁講嘢,明明我哋幾個好心嚟救人,你唔小心一嘢將隻曱甴打入我哋朋友個口,我都當你意外喇,但你都唔好再踩多我朋友一腳啦,你咁本事,不如你試下生吞隻曱甴睇吓暈唔暈!」
 
「係囉……Chloe……一人少句啦……」明顯最好心嘅清純女孩幫口調解:「不如我拎支紫花油比你朋友搽吓啦。」
 
阿健接過紫花油然後盯住TB Chloe:「好彩世界仲有好心人,係呢,唔知你點稱呼呢?」
 
清純女孩細細聲講:「其實Chloe佢人好好,只不過係俾曱甴嚇親……我叫芷琳,你快啲睇你朋友有冇事先啦。」
 
人工呼吸呢招舊到不得了嘅招數,王晶都唔拍啦,見好就收好緊要,大佬發係紫花油嘅神助下終於甦醒。
 
一輪鬧劇之下,四男四女終於有個基本認識,短頭髮嘅TB Chloe,清純嘅芷琳,MK妹嘉嘉,仲有之前唔多參與嘅ABC Christina,第一步成功踏出。
 
大佬發轉醒之後,對於自己生吞曱甴呢件事都只能硬食,唔食都食咗,當然扮無嘢:「其實好小事,我阿發有咩風浪未見過,<<人在野>>呢味嘢我都試唔少,最緊要女仔安全無事。」
 
「扮咩扮啊,頭先仲學人暈低,依家同我扮英雄!」Chloe始終唔肯放過大佬發,可能佢天生人又肥樣又賤,Chloe睇佢唔順眼。
 
「你個死TB,我都未同你計你一掌拍隻曱甴落我口單嘢,嗱,我就唔打女人嘅,不過如果你唔當自己女人嘅話,我都可以郁手,同你隻揪,最多我讓你單手。」大佬發見到Chloe就嬲,做男人可以退讓,但俾人奚落就點都唔得。
 
呢句你當自己係男人定女人,完全直擊Chloe痛處,到底TB係男係女,係定義上都係一個禁忌,而大佬發呢句亦觸摸到佢嘅逆鱗。
 
「死肥仔,係咪打啊,夠膽你就郁手,你個朋友做警察啊可,幫我做證人啊,你個朋友想郁手打人,我告硬佢啊!」Chloe不甘受辱正手抽擊。
 
「啊你個死TB以為我真係唔敢打你啊!」大佬發幾時試過俾人咁挑撥過,本來Chloe好好打扮下,真係一個唔錯嘅美女,但佢依家板起塊臉,大佬發由下面硬了變成拳頭硬了。
 
正當大家想勸交嗰陣……
 
大佬發突然反胃。
 
「喂,唔好郁手喎,話晒我都係警察,你係我面前打交,我唔理隨時份工都無埋,咦……發哥你臉色唔係咁好喎。」阿Kent擋係中間時發現大佬發勢色唔對。
 
連續幾次反胃後,大佬發意識到一件不得了嘅事,頭先佢生吞飛曱甴,理論上,隻曱甴可能未死……而佢依家正正發現自己個胃有嘢郁緊。
 
「屌唔得……」大佬發一諗起呢個可能,連廁所都頂唔到直接係個廳度嘔。
 
旁觀者都從佢行動中諗到某個可能,胃酸可唔可以溶化到被喻為世上最頑強嘅生物小強呢?
 
呢個世紀疑問,係兩秒之內就得到解釋。
 
一隻黑色物體係大佬發嘅早餐,分別在雞扒同通粉之間出現。
 
而佢亦即時展現佢頑強嘅生命力,係一堆胃酸之中振翅高飛。
 
在場所有人都有種想嘔嘅感覺,大佬發見到曱甴重現亦鬆咗一口氣,曱甴重見天日之時,竟然再次向住Chloe飛過去,大佬發即時叫好:「喂,你頭先唔係好輕鬆咁話食咗都無乜嘢嘛,依家係你表演時間喇……」
 
點知下一秒,悲劇再次出現,Chloe再次一掌拍向曱甴,而軌跡係物理上係向住在場嘅大佬發口中飛向,佢個「喇」字如果無講,就可以避過一劫,可惜大佬發係要加個尾音上去。
 
上次可以話大家都睇唔到呢一幕,今次真係人證物證都有齊。
 
大佬發今年三十一歲,佢面幾多風風雨雨,人來人往都好,已經十一年無喊過,但今日,佢真係忍唔住流出埋藏咗十一年嘅男兒淚。
 
旁邊阿標目定口呆話:「傳說中嘅響尾蛇連中兩口……」
 
大佬發大叫:「一次就偶然,兩次喇,死八婆你特登嘅!我同你死過!」
 
蔣薇 Facebook Page:
 
www.fb.com/maydreaming
 
圖片來源:互聯網

 

COMMENT