2015/08/20

男人的需要(二十五)《男人需要拋妻棄子》第七回

20150813 蔣薇_MenClub Column
圖片來源:互聯網
 
每個故事中,都總有一個不幸嘅人,但無人會相信自己就係呢一個幸運兒,大佬發佢冒住生命危險連續兩次生吞曱甴後,佢人生已經昇華到一個新層次。
 
頓悟過之後,大佬發放下拳頭,立地成佛,講咗句「阿彌陀佛」之後,佢靜悄悄咁入咗廁所,再次扣喉將曱甴嘔出。
 
然後再靜靜地返出嚟,彷彿頭先咩事都無發生過一樣。
 
喺廳嘅人都感到一種悲哀,幾個女仔已經商量好,夾手夾腳推咗Chloe出去,Chloe明顯唔情願地,用一把差唔多聽唔到嘅聲線,急口令嘅速度講咗句:「對唔住。」
 
大佬發對Chloe嘅道歉不置可否:「算喇,唔發生都發生咗,人無事就好。」
 
阿Kent點會放過呢次機會,家陣幾乎佢哋講乜要求,班女仔都唔會好意思拒絕,之但係都要諗個好少少嘅形式,唔通真係同人講以身相許咩,如果真係Work,佢又唔介意啊,但大佬發嘅犧牲值唔值得人哋以身相許先係問題。
 
「都就嚟天黑喇,過去嘅唔開心事我哋唔好提啦,大家入Camp都係想放鬆吓,不如咁啦,我哋準備咗BBQ嘅食物,不如今晚一齊食餐好嘅,來忘掉錯對,來淫……啊,來狂歡派對!」阿Kent差少少講錯嘢,好彩班女仔都唔覺意,但呢個提議都令佢哋思考咗一陣。
 
ABC Christina果然人如其貌有住鬼妹仔嘅性格,極力遊說姐妹們一齊BBQ,對男人們最大敵意嘅Chloe亦唔再阻止,一副你哋想點就點嘅樣。
 
MK妹嘉嘉都係貪玩一族,芷琳就無乜所謂,終於決定好要一齊燒嘢食,幾個男人就話要返去準備食材,相約咗一陣見。
 
一返到房,幾個兄弟望住大佬發,終於忍唔住拍咗佢膊頭表示:辛苦你喇。
 
「大佬發,全靠你嘅犧牲,我哋離目標已經不遠!」阿Kent係呢度最大得益者,所以佢笑得特別開心。
 
阿標見大佬發無晒反應:「唉,大佬發,女呢家嘢,唔好強求啦,平常心啦。」
 
阿健反而奇怪咁問:「你唔係真係吞咗兩次曱甴頓悟嘛?江山易改,本性難移,係兄弟面前就唔好扮嘢喇。」
 
「哈哈哈哈哈哈哈哈哈哈哈哈哈哈哈哈哈哈哈哈哈哈哈哈」大佬發低頭笑,愈笑愈大聲:「我頓悟喇……我頓悟喇……我已經唔想再媾女……」
 
「佢似唔似傻撚咗?」阿標見到大佬發一副瘋狂嘅樣,忍唔住起雞皮。
 
「Kent哥,你要隨時準備制服佢喎,一陣佢谷精上腦,連我哋都唔放過,我唔想變太陽花啊!」阿健見到呢個情況都覺得唔對路。
 
阿Kent神色凝重咁望實大佬發:「發哥,你無事嘛,有咩可以同兄弟們講喎,我哋幫到實幫!」
 
「哈哈哈哈哈哈哈哈哈哈哈哈!」大佬發繼續笑,一路笑一路係佢褲袋拎咗樣嘢出嚟。
 
係一個普通女性用的旅行化妝容器,但裡面存放嘅唔係卸妝水或者沐浴露,而係一隻似曾相識嘅生物。
 
「小強!?」阿標不能相信眼前嘅事。
 
「嘿嘿嘿……」大佬發聲音突然變得沙啞:「頭先我已經頓悟,頓悟咗呢次嘅遭遇唔係神賜我嘅媾女機會,而係神要我制裁呢個可恨嘅TB……我要親手將呢隻帶俾我無限痛苦嘅小強,塞入佢個口入面,然後要佢吞完再嘔,嘔完再吞,吞完再嘔,嘔完再吞……」
 
大佬發眼中出現一種難以理解嘅狂熱,口中不停重覆住又吞又嘔。
 
「怕且……佢真係痴Q咗線……」阿標搖搖頭嘆道。
 
「唉,佢痴線都算喇,我怕佢一個唔好彩,自己又吞多獲咋……」阿健對大佬發嘅狂想唔抱希望,反而帶點悲觀。
 
阿Kent作為大佬發戰友,佢想媾女,唔係玩埋呢種重口味遊戲啊,就算玩,都等佢媾完女先啦,但私人恩怨佢又唔方便插手:「大佬發!唔好咁唔爭氣啦!對面有四條女!」
 
「唔係,對面得三條女!其中一個係魔鬼嘅化身!我要佢……」大佬發打斷咗阿Kent嘅勸告,又Loop一次自己堆嘢。
 
「唉……好好好,對面三條女,你想佢吞乜都好,點解要搞到咁重口味呢……怨怨相報何時了……」阿Kent無奈地說。
 
大佬發聽到即時著咗燈:「怨怨相報何時了……」然後佢拎起樽曱甴:「嗱,有邊個敢吞咗佢,我就聽佢講!」
 
三條麻甩佬望住個樽,異口同聲話:「有仇不報非君子!」
 
好好地一個媾女之旅,點解會變成咁……
 

 
蔣薇 Facebook Page:
 
www.fb.com/maydreaming
 

COMMENT