2015/09/02

男人的需要(二十七) 《女人的友誼》

20150902 蔣薇 MenClub
 
圖片來源:蘋果日報
 
新鮮出爐的港姐麥明詩,得獎後被眾佳麗杯葛,只有曾志偉和鄭裕玲兩位神級主持前往解圍,才讓10A狀元不致成為謝師宴毒撚。
 
在臉書上看到女性朋友恥笑說:「贏咗個獎,輸咗友誼,值得咩?」
 
作為男人,見慣不怪地只好笑而不語。
 
女人的友誼是很玄的關係,陌生、相識、熱戀、反目、分離,像人生走馬燈一樣的快進了16X。
 
「咦……Amy同Stephy呢排搞乜,有佢無我咁嘅?明明早幾日仲見佢哋糖痴豆拖住手好姐妹喎……」
「女人嘅野,你識條鐵咩?話說Amy之前同Stephy撞衫,兩人死都要話自己買先,最後咪炒大鑊囉!」
「吓……咁都好炒……都唔駛有你無我嘛?」
「同女人唔明豆腐火腩飯係男人嘅浪漫一樣,呢個世界有樣叫女人嘅友誼,男人唔會明㗎喇。」
 
亞軍龐卓欣翌日Show off友誼萬歲,連同幾位港姐輸家同遊相片,Caption:「唔見你哋一日都唔得!」唔講我仲以為識咗十幾年、逾越生死、劫後重生、萬水千山總是情的好姐妹,但事實這班唔見一日都唔得的好姐妹,只不過係相識不過兩個月的「密友」。
 
如果你有女朋友,你肯定會聽過佢細數姐妹們,一直你以為佢哋好FD嘅,原來並唔熟,即使拖晒手、臉貼臉自拍、婚禮做姐妹伴娘都好,同熟唔熟無關。
 
想了解女人獨特邏輯?建議你學「禪」,人生有三種境界:「看山是山,看山不是山,看山仍是山。」如果你信女人講山,就係山,你只係一個入世未深的小毒撚;如果你明白女人講山,其實唔係講山,恭喜你,你已經看化咗好多事,亦避免唔少麻煩,算係資深男女心理學家;最後一個境界係,看山仍是山,呢種境界,你已經唔再去思考究竟女人講山,到底係講水、講人、講Feel、講心情、講天氣、講東講西定講完就算,因為你妄想深入女人思維邏輯,就好似Inception咁,你挖完一層又一層,最後你已經分唔清到底個陀鏍轉係現實定停係現實。
 
反觀最近同樣熱議的四個小生去旅行,四哥曾江大打出手,作為男人就好明白其實唔算得係乜。男人就算打交都好,Say個Sorry,大家劈兩杯,前事不計就真係前事不計。
 
男人從不炫耀彼此之間有幾好兄弟,當你有難時自然就數得出;男人亦唔需要一日不見如隔三秋,只講一Call即到。
 
講返麥明詩,講真,以男人角度睇,靚就唔係靚㗎喇,MenClub求其開個Post都靚過佢,不過,勝就是勝,敗就是敗,更何況,想贏並不是希望得到輸家的恭喜。
 
用男人的語言說:「三分已袋,理撚得你!」
 
蔣薇
 
www.fb.com/maydreaming
 

COMMENT