2015/09/17

男人的需要(二十九)《事業與愛情》

20150917 蔣薇 MenClub
 
圖片來源:互聯網
 
如果有一份夢想中嘅工作放喺你眼前,待遇良好有前景又有發揮,但因為呢份工經常要出差,所以你女朋友唔想你做,你會如何抉擇?愛情、事業,只得其一,跟阿媽同老婆跌落海救邊個嘅難度不惶多讓。
 
如果一個女人,天生缺乏安全感,你就好大鑊。點解?成日Check住你,問你愛唔愛佢,算係小兒科,你每做一件事,只要佢唔喺你身邊,佢都會好唔安樂,好唔自在,更會懷疑你係唔係做緊對唔住佢嘅事,再嚴重就會影響埋你嘅事業。
 
名句,一個成功嘅男人,背後總有個支持佢嘅女人,你有冇聽過成功男人背後總有個對佢充滿猜忌,要求你陪佢愈多愈好,痴身過你部電話嘅女人呢?
 
事業,需要時間去經營,我有個朋友,佢有一個新Offer,間中要來往北京工作,女朋友一聽,唔係打唔係鬧,而係兩行眼淚好似開水喉咁決堤,男人最怕呢種,打鬧要買包包都易解決,你喊,已經唔可以用道理去解決。
 
最有趣係,欠缺安全感嘅女人,寧願你返份得閒少少,但搵無咁多嘅工,令你有時間陪佢,容許我講一句,呢種拖你後腳嘅女人,可能會摧毀你人生。事業係男人嘅根本,明明你可以行多步,佢就叫你休息吓,問題唔係你攰喎,而係你女朋友想你陪佢休息下。
 
至於陪佢休息乜?唔知啊,女人最無敵嘅一句,有你係身邊,乜都唔做都可以,男人永遠唔會理解呢句嘢,咩叫乜都唔做?咁一係就瞓覺啦,再唔係就扑嘢,閒落嚟發呆,不如打下機啦,咁又唔得喎,你打機就唔係陪緊佢,喂你又話一齊做乜都得嘅?Holy Shit,你講邏輯?呢度唔係法庭,唔需要講理據,更唔會講邏輯。如果愛太理性,女人就會覺得唔浪漫㗎喇!
 
講真,男人最大的魅力,來自於佢嘅生活,而生活佔最大比重就係事業,人生有幾多個十年?有力闖有力捱嘅時間,揮霍係愛情,完全係影響一生嘅決定。
 
點解男人要事業?都係為咗令將來生活更好,男人為將來,會犧牲現在。女人呢?女人要現在,喂,又唔等於佢哋願意放棄將來喎,Why not both?一早話女人嘅邏輯好屈機。
 
現實咁講,愛情同事業,永遠都係事業先,事業行先,愛情先可以穩固;愛情行先,事業無之後,你會連愛情都無埋。
 
情侶之間,並非要控制對方,意見可以比,但如果對方考慮過之後仍然想做,作為一個好伴侶,就應該全力支持。
 
一個好嘅女人,可以令你事業更上一層樓;一個差嘅女人,可以令你事業一落千丈。
 
點揀?兄弟們心裡有數啦。
 
蔣薇

www.fb.com/maydreaming

COMMENT