2015/12/01

失敗男人系列(三)《拋妻棄子周永恆》

周1
圖片來源:互聯網
 
人渣太多,多到數唔晒,千挑萬選,這次說說周永恆。
 
成龍大哥話,外遇是每個男人都會犯的錯,我認同。每一個兄弟結婚之前,我都會問,你確定?真係玩夠?真係定性?十個有八個都會答係。
 
可能我係個比較傳統的人,結婚,寓意的不單是一紙婚書、一份合約,更是一道承諾。
 
結婚,從來無人去迫你結,更無人指定你要娶任何女人,偏偏好多人係自由戀愛嘅世代,搞出好多連盲婚啞嫁更不堪的婚姻,原因係咩?好簡單,佢連一個基本男人都未做到。
 
係香港,好多人仲執著緊暗戀、苦戀,坦白講,男人老狗,連愛都唔敢去講,唔敢去愛就食得屎啦,所以嗰種苦戀暗戀的自虐文章我都唔多寫,某程度係庸人自擾之。
 
我要講嘅係,一個好少男人會講嘅問題──不愛。
 
山盟海誓,我愛你呢種說話,大家講出嚟易過食生菜,甚至係講到麻木了,情侶之間簡直就係同講早晨差唔多,可惜呢個世代,人話變就變,前面有個又索又後生嘅比你揀,你揀唔揀先?口裡說不,身體卻很誠實,男人就係以下體思考嘅動物,變心係咪罪無可恕?唔係,罪無可恕的是變心卻不承認。
 
簡單一句,今日我唔再愛你喇!我搵到個更愛嘅人! 分手之後,再開始新戀情,對於一個成熟男人來說,敢愛之餘,更應敢不愛,如果你正正式式分手,再同另一個一齊,Fine,未結婚,係你自由,唔會有人針對你。呢兩句說話好難講咩?呢件事係咪真係咁難?其實真係好難,點解?因為唔想做衰人囉,係,你無做到衰人,你做咗升級版,名為賤人。
 
結婚之後仲會去鍾意第二個,呢件事就更荒謬,乜你結之前未諗清楚咩?你可以話,之前無諗過會遇到一個咁嘅人嘛!如果只係男女朋友,呢件事都還可以講得通,分手囉。之不過結婚呢個承諾,當你講「我願意」時,遊戲規則已經係即使你遇到個再好嘅人,都唔可以離場,如果你無呢個覺悟,麻煩你係宣誓時講一講自己嘅免責聲明,如果你老婆咁都肯嫁你,咁你變心要離婚,你絕對無問題。
 
未諗清楚就結婚,未諗清楚就生仔,仲要打老婆,呢種人無資格做男人,男人老狗,愛就愛,唔愛就唔愛,應承咗就要做到,好似周永恆呢種人,大家引以為鑑,好自為之。
 
失敗男人,由春袋主導;
成功男人,由腦袋主導。
 
蔣薇
www.fb.com/maydreaming

COMMENT