2015/12/31

《男人三十,重拾一種運動吧》

31
 
圖片來源:互聯網
 
三十歲,你不得不承認自己機能開始走下坡,那段通頂唱K,第二朝再游水打波已成偶爾回味的往事,游水還游水,打波還打波,兩樣一齊做,出事㗎嘛!
 
每個男人都有段食極唔肥的歲月,食Buffet唔食佢幾個周天都對唔住自己,卡路里?鹽?糖?澱粉?Who fucking care?當幾個舊同學聚會之中,不約而同被N年無見的朋友笑說:漲咗喎。有時行山時,行多幾步都喘氣叫救命,通頂之後第二日好似行屍走肉咁,對住塊鏡,你仲敢唔Care?
 
廿零歲,工作剛剛起步,應酬交際玩樂多,細個無錢,迫住搵唔需要花費太多嘅活動做,運動就係最好嘅選擇,打得一手好波,溝女都易;大個有錢,食吓好嘢,飲吓好酒,唱開Lunch K幾十蚊嘅變成唱通宵K開酒幾舊水,運動?唔再係大家趨之若騖嘅活動,甚至你話不如得閒打吓波,大家有工作、有家庭,想約人都難。
 
人到三十,要玩嘅,都玩過,甚至有厭嘅感覺,有時會諗,玩嚟做乜春?再望望自己個肚腩,心血來潮不如做吓運動啦。
 
或者大家都面對中年危機,約運動都易咗,行山又好,跑步又好,游水又好,打波都好,驚訝地你會約返唔少N年無見嘅朋友,好似我咁,原本諗住落街打波,悶就開始約人,約一個兩個,先發現有另外嘅朋友都想Join,由一條友跟隊,變成有三個人一隊,進化到三打三都夠人,依家,打全場都仲有人換。
 
球場之中,同酒吧餐廳唔同,大家唔係坐定定鳩吹,傾邊隻股票升跌,吹自己買咗咩樓,飲啖紅酒再懶成熟扮識飲,有時候,男人之間唔駛講野,憑動作,憑勝負,憑汗水,憑眼神,或者呢種就係心靈上嘅溝通。
 
有一刻,我哋唔再講金錢地位知識,重拾原始男人的本源──戰鬥。
 
作為雄性生物,我哋開始忘記戰鬥,忘記所謂的勝負,直到重拾運動,係急速的呼吸中,你可以感受到自己的心跳,面對眼前的對手,沉寂的爭勝心再現,一個瞬間,贏或輸,你搵到早已遺失的那種興奮感。
 
完事後,坐在球場上,跟朋友聊天,汗水化去你平日的面具,彷彿回到最初的自己。
 
男人三十,試試重拾一種運動,你可能會找回友情,找回健康,找回年輕,找回自己。
 
30
 
蔣薇
www.fb.com/maydreaming

COMMENT