2016/01/14

《回歸現實的愛情》

2

圖片來源:互聯網

從前,有一個女生叫三個追求者環遊世界,一年後,甲去咗歐洲美洲非洲,乙去咗澳洲,丙無錢,佢最後繞住女生走咗一圈然後講:「妳就係我嘅世界。」最後女生揀咗最有錢嘅一個。

一個得啖笑嘅笑話,唔少男人認真咗,高呼女人現實,聲討港女拜金,既然大家認真,咁我亦認真一下,喺度為大家做個Case Study,話比大家知點樣捉錯用神。

「妳就係我嘅世界。」講得好好聽,亦好深情、浪漫,不如問返大家,如果你係女人,會唔會揀呢個浪漫嘅男人?只要有返少少閱歷,無論男定女都好,都會回歸現實,咩一生一世、咩共患難、咩始終如一,大家領過N次嘢,咁多次慘痛經歷得到咩教訓?行動最實際。

唔好講愛情,男人工作上都遇過唔少講得好聽,但最尾食晒屎嘅Deal,試過有個客講到係威係勢,張單有幾錢幾錢,一定會做咁,最後拖拖下乜都無,付出努力、時間之外,仲輸埋信心同感情,愈好聽嘅說話,傷得愈深。

去環遊世界,只係一個考驗,如果考急才,丙贏幾條街,但整整一年時間,丙無錢,最後只係出嚟行個圈,相比起甲同乙,付出過咩,大家心知肚明。

窮,唔緊要,千祈唔好睇網上流言就將全世界女人都當成港女,坦白講,邊得嚟咁多港女?我自己數身邊女性朋友,貪錢一定有,但並唔係嗰種單單睇錢嘅人。

一年時間,丙做過乜?如果丙係同個女仔講:「呢一年,我無去過任何地方,為咗你,我努力工作,不斷儲錢,儲到一筆足夠我哋結婚生仔嘅錢;工作上雖然暫時未有好高收入,但至少我做到中層,可以令我哋衣食無憂。你係我嘅世界,呢一年裡面,我為咗呢個世界,做咗好多好多,相信呢個世界,有你喺度,會變得精彩美好。」

我相信,肯定比單單喺個女仔面前轉個圈有說服力得多。

男士們,我哋唔係張國榮同梁朝偉拍緊王家衛嘅戲,單靠情話同浪漫,你可以得到激情;想要愛情,成熟男人會用時間同行動去證明。

或者你會講,挑,你講咁多,最後條女都係揀最有錢個個咁點?呢種女人,送比你都唔要啦兄弟。

飛1
蔣薇
www.fb.com/maydreaming

COMMENT