2016/02/04

《致我們逝去的王晶》

20160204_蔣薇menclub column_致我們逝去的王晶
 
圖片來源:互聯網
 
無可否認,我哋都係飲王晶奶大的。
 
由八十年代精裝追女仔、賭神,到九十年代賭俠、鹿鼎記、超級街頭霸王、九品芝麻官、大內密探零零發、賭俠大戰拉斯維加斯、千王之王,我隨口都可以嗡得出當中對白。當年好多人話,包括我老豆,叫我唔好睇咁多王晶嘅屎尿屁,但我偏偏就係忍唔住笑,到今時今日,我耐唔耐同朋友吹水,都會拎佢嘅對白出嚟講。
 
王晶係唔係一個仆街?大家心知。佢演繹嘅角色有邊一個唔係仆街?演得入型入格,佢係唔係仆街,我唔講,但佢一定唔係好人囉。
 
不得不承認,王晶佢捉得住消費者同觀眾心態,當時興乜,佢就拍乜,賭風強就拍賭神,嚦咕嚦咕新年財紅,又拍一系列雀聖片,追女仔系列賣座,佢三年拍咗三集;逃學威龍頭兩集唔關佢事,佢拍咗套最無味道嘅龍過雞年。
 
有時睇返王晶舊片,我真係會諗,當年佢對大陸指指點點串串貢,今日又可以大聲回到祖國懷抱,無它的,佢真係一個商人,同陳百祥係同一類嘅醒目仔,好似鹿鼎記入面嘅多隆一樣,風吹牆頭草,九七前,市民驚回歸,佢就抽下水;九七後,市民憎大陸,咦?咁點解佢唔拍片鬧大陸?好簡單,因為你只係佢1/25嘅客仔,站係佢立場,佢對觀眾負責,只不過你已經唔再係佢嘅觀眾。
 
係我心目中,屎尿屁會令我發笑,會令我一有時間無嘢做會上Youtube搵返套賭俠大戰拉斯維加斯嘅王晶,已經死咗,你問我二千年後佢拍過乜,Wiki一下先知,原來唔少,但我真係無睇,亦唔會睇,睇亦唔會記得嗰種。
 
係,我飲王晶奶大,不過奶媽佢嘅奶開始變壞,有種充滿銅臭嘅酸味,真係唔係我杯茶,呢啖奶,留俾內地同胞飲吧。點為之成功?佢覺得係有樓同有錢,但係我心目中,我都係鐘意以前嘅佢,呢種感情,唔係用錢衡量到。
 
當年同大家一齊做窮小子溝女,好似你身邊一個損友伴你成長嘅王晶,今日,當佢死咗算啦,起碼你仲可以從舊片中回憶一下佢嘅曾經。過年,我唔睇賭場風雲喇,係屋企開返套千王之王睇好過。
 
 
蔣薇
www.fb.com/maydreaming

COMMENT