2016/02/12

《識得賭,一定係咁賭》

unnamed-1
圖片來源:互聯網
 
細個唯一可以合法地喺屋企人面前賭嘅機會,就係過年。賭,男人點可以唔識,你可以唔賭,但你唔可以唔識賭。
 
煙King照我茶煙飯,沖涼Dup骨靠蛇花,供車供樓靠夫佬,一隻大Dee養全家。多麼的豪情壯志,多麼的氣吞天下!賭無問題,問題係你贏定輸,輸得多叫病態賭徒,贏得多就叫賭神啦!
 
好多人都話唔好賭唔好賭,不過我話比大家聽,賭唔係想像中咁負面。
 
細個就同長輩拜年,大個就同朋友拜年,有乜開心得過成班朋友賭兩手打吓衛生麻雀?係,聯絡友誼,食飯飲茶行山都可以做到,點解仲要賭錢?但如果你同朋友未賭過錢,未賭到媽媽聲,熟極有限。
 
當你四圈比上家誅牌兼截糊,當你比三條粉腸鋤大Dee屈你十三隻,當你玩大細比班人眾志成城煲爆你個莊時,偏偏輸到死,成班人仲可以笑到肚痛,然後幾十年後都拎返出笑,個幾百蚊買到快樂,比同價紅酒仲令人深刻。
 
醫生話打牌治老人痴呆,我同意,四圈就可以夠你講返當年成個中學八卦,邊個暗戀邊個,當年某阿Sir有幾仆街,搜書包嗰陣收埋違禁品係邊,每年都講,講講吓都成十年,打完一輪,可能都係幾十蚊上落,但當中價值用錢都買唔到。
 
賭錢同時可以令你學習面對逆境,拎起手牌差,你會學識有時輸少當贏,當每次都有贏有輸時,勝負慢慢就變得無咁重要,頂完一場,下場再努力過。
 
同埋你可以認清好多人真面目,有人牌品差,好計較勝負;有人無乜所謂但求快樂。當你輸到死時,有人會暗地裡鬆返比你;亦有人贏完錢之後拎錢買嘢食大家開心;甚至玩完一輪,大家當無數。一個人佢值唔值得你深交,從佢行為已經睇得出,用幾百蚊去睇清一個人,抵!
 
大賭可唔可以養妻活兒我唔知,我亦深知自己唔係呢種料,但大時大節,小賭兩手,的確怡情。
 
賭,求財可以得財,求開心可以得開心。但你要求財又求開心,就太貪心。
 
除選擇賭唔賭之外,你仲可以選擇點賭、賭幾大、同邊個賭。識得揀,賭都可以好開心。
 
蔣薇
www.fb.com/maydreaming

COMMENT