2016/02/18

《當恭喜發財變成身體健康》

20160218_蔣薇_MenClub Column_當恭喜發財變成身體健康.docx
 
圖片來源:互聯網
 
過時過節,例牌一句恭喜發財,細細個覺得無嘢比發財更重要,無辦法,細路仔係天真,同埋無病無痛,一個新年千幾二千銀利是錢,夠買幾隻Game,或者遊戲機同模型,當時就係咁簡單。
 
人大咗,拜年嗰陣,話題總會牽涉到健康問題,上一輩身體出現問題好常見,糖尿血壓膽固醇呢家嘢算小事,老人痴呆身體退化都算中級,高級嘅費事講,大家都知。
 
細個親戚過身,除咗少咗利是外,無乜感覺。識諗之後,見到拜咗幾十年嘅親戚開始有病痛,感覺真係唔同,以前年初一閒閒地走三四場,過一排少咁個,再過一排又少咁個,新年變得愈來愈清閒,變得愈來愈無氣氛。
 
拜年坐低,聽住阿媽講之前做手術,親戚關心完一輪,原來佢哋都有相似問題,打牌嗰陣邊會仲問:幾時拍拖、幾時結婚、你搵幾多之類,講真,如果你班親戚可以問到以上問題,你哋都算幾幸福。當你圍埋坐低傾嘅係,糖唔好食太多,血糖會高;試吓食木耳,聽講抗癌;一日飲八杯水做吓運動,排吓毒素;邊度睇中醫有介紹,可以保養身體之類,你就會明,原來到咗某個年紀,話題一變,就變。
 
好多人擔心買樓同結婚,當你無健康嗰陣,買樓同結婚又關你乜事呢?生活上無數決定,其實都基於一個假設,就係你健健康康,比十樣你覺得重要嘅事,要你一樣一樣拋棄,最後你唯一必須留住的,就是生命。
 
今個新年,見到親戚朋友,第一句,我永遠都係講身體健康。
 
身體健康,太老套了……
 
就好似苦瓜一樣,當你有返少少人生閱歷時,你就會呷得出呢句老套說話,無疑是最好的祝福。
 
蔣薇
www.fb.com/maydreaming

COMMENT