2016/03/04

《讓人嘔心的呻吟男》

呻-3
 
圖片來源:互聯網
 

呢幾年興起一班人,我將佢哋定義為呻吟男,Sell苦情,Sell傷感,Sell軟弱,一見到呢種男人,我就有種覺得嘔心嘅感覺,心諗,男人幾時變成咁?
 

最常見係嗰批WhatsApp攻防戰為咗個藍剔,又話咩已讀不回等而叫春嘅煩膠,喂,唔回你咪唔回你,好簡單,對你無興趣囉,唔得閒囉,唔撚想回你囉,嘩屌,竟然有人可以就住一個藍剔寫幾千字去發表自己傷感,披露嗰種既期待,又怕被傷害;想放開,又怕錯過之戇鳩情懷。
 

明明一個電話可以解決件事,放喺WhatsApp就變成無限暇想,男人老狗,鐘意人咪鐘意人囉,換轉你係女主角,你見到個男人諰諰縮縮,你都覺得唔開胃啦!Okay,如果你係十零歲嘅青澀少年、感情初哥,都尚可以原諒,但家陣廿鳩幾歲人都日日叫春,何苦呢……
 

睇埋一堆網上短句,嘩好中啊!好心嗡!好黯然!大佬啊,毒藥嚟㗎!有問題,如果係個男人就去解決,我成日都認為男人同女人最大分別係,男人真係會解決問題,而女人只係求講兩句,講完個心就舒服,然後繼續輪迴係呢種悲劇之中,可惜,我錯喇……愈嚟愈多男人都好陶醉喺呢種漩渦之中,以為自己飾演緊男主角,賣悲傷賣慘情其實真係無市場,可能你呃得到唔少Like,但你在意嘅女人永遠唔會因為你慘而對你動心,或者有,都係可憐你。
 

你會問,呻吓都唔得?得,但我問你,呻完之後點?通常有兩種人,一種人呻完之後就會諗辦法去令自己解脫,我指嘅呻吟男係,你年頭聽佢咁講,年尾佢都係咁嘅款,作為朋友,聽你呻吓好正常,但再好嘅朋友見到你由年頭呻到年尾,真係為你好嘅,唔係再聽你呻,而係一句屌醒你!
 

男士們,呻吟只係一時情感解脫,男人最重要係進步,Be a Man! Be a Better Man!停止呻吟,因為幾年後你望返轉頭,你就會覺得自己好肉酸!
 

呻吟係女人專利,男人唔好學!點解?你試下對住鏡頭呻吟一下,再睇返,肯定連你都覺得自己嘔心!
 

蔣薇
www.fb.com/maydreaming

COMMENT