2016/03/10

《如果地球沒有女人》

20160310_蔣薇_MenClub_

 
圖片來源:互聯網
 
如果沒有女人,男人會更開心自在,這是一個男人圈內酒後的奇想。
 
朋友A:當你畢業平均搵萬五,比完家用保險自己洗費雜費後,其實可以儲到5000蚊,一年儲到6萬,如果二十二歲大學畢業,到你廿七歲就有30萬喇,問題就嚟喇,正常你有個同齡女友,佢一定會迫婚,當你三十歲要結,大家有準備啦,結婚嗰一刻你手頭上先得48萬,以現時港女結婚理念,30-40萬走唔甩,到時就一筆清你袋!最恐怖係,結婚你唔駛買樓啊?到時呢48萬比首期定結婚啊?
 
朋友B:如果你有女朋友,你一個月仲儲到5000蚊你就好嘢喇,喂,當你一個禮拜食餐好嘅,一個比兩份錢,計你600蚊啦,再睇場戲,又100,得閒買小禮物又好、買嘢飲又好,每月紀念,周年、聖誕節、情人節、中秋節、清明重陽復活洗你一筆,平均一個月至少洗多你4000蚊,你預就預每月儲1000好喇!都未計你條女得閒就話要去個旅行,春秋二祭咁款,分分鐘你仲要貼返錢落去啊!
 
朋友C:所以話,你月入無25K以上,真係唔好諗結婚,條數根本計唔掂,你有屋企撐例外啦!
 
朋友A:咪就係!一個名牌袋等於幾部PS4,一粒鑽石等於一隻撈,無女人嘅話,生活不知幾寫意!
 
朋友B:係啊係啊!晚晚唔駛傾一個鐘電話,又唔需要面對口不對心嘅發脾氣,有時真係搞到做乜都無心情,都唔知為乜,撞正個幾日,一個痛,兩個受。
 
朋友C:如果無女人,就唔駛乜都估吓估吓,又唔講,又要人做到,做唔到又發脾氣,仲要好似我錯咁喎,根本同女人傾就無得講道理。亦唔需要睇咩《男人們搞不懂女人在想的5件事》《男人們千萬別做這13件必定會惹怒女人的事》。男人係講邏輯,對於無邏輯嘅嘢會Hang機,有時仲要明明無做錯都要認錯喎,真係無晒尊嚴啊!
 
雖然講就係威係勢,但最後朋友ABC都要返去報到,繼續口裡說不,身體卻很誠實嘅生活。你會問,既然咁辛苦,仲點解要堅持落去?為咗扑嘢?為咗生仔?
 
正如圍城一樣,城裡的人想逃,城外的人想進。
 
留下的總有原因。
 
不如問吓你自己,如果你講唔出呢個答案,單身比較適合你。
 
最可憐的人永遠是在牆內只看自己的壞處卻張望牆外的好處,這種人即使在牆內和牆外都得不到幸福,只能徘徊在可悲之中。
 
蔣薇
www.fb.com/maydreaming

COMMENT