2016/03/17

《用錢買時間的年紀》

 
圖片來源:互聯網
 

金庸

課
 
細個打機,可以用幾百個鐘去練一種武功,坐喺部電腦前面洗寶物洗通宵,上網搵攻略開外掛搵朋友組隊都好,總之為咗打機可以去得好盡,有唔少朋友十幾年後輕嘆:當年我會考,係衰喺打機度。
 
依家市面上絕大部份遊戲,都係迫你課金課金課金,以前最常用嘅外掛打寶系統,搵咗個形式比你自動戰鬥,或者叫你用錢去買經驗值,買最強武器,買生命,買技能,幾乎你諗到嘅都可以俾你買到。
 
以前我唔明點解打機要課金,俾心機俾時間就做到嘅野,點解要浪費錢去買?打寶練功咪就係打機樂趣囉,Skip咗佢咁打嚟做乜?
 
打機唔課金,係我一直以嚟嘅宗旨,你叫我俾錢買Game?OK!但我絕不課金!
 
直到一次,我花咗好耐時間去玩一隻Game,都算打得唔錯,有返咁上下水平,然後我介紹俾朋友A玩,佢都好樂意一齊玩,三日後,我問佢玩成點,佢俾一俾個Account我睇,短短三日,就超過咗玩咗三個星期嘅我,無錯,佢課金玩,仲課唔少嗰隻。
 
我當然同佢講返我套理論,問佢點解要浪費錢,佢話:
 
「咁大個人邊有咁多時間打機,搵到一兩個鐘玩都算還神喇,如果唔課金,根本就玩唔落去,同你簡單計條數,我一個鐘搵200蚊咁計,如果我放咗時間去玩唔做嘢,每個鐘就蝕200蚊,如果200蚊可以買到三個鐘頭磨隻Game嘅時間,除笨有精啦!」
 
聽佢咁講,可能我哋都進入咗用錢買時間嘅年紀,用十個鐘練功,不如用錢買十個鐘時間,用多咗嘅時間搵錢同休息。
 
今時今日嘅我哋,唔再係當年可以練「野球拳」練五千下,玩寵物小精靈升盡晒等級,同埋玩曹操傳S/L成幾百次嘅年輕人。
 
面對衣食住行嘅壓力,打機已經係一種浪費,花時間去打更加係奢侈行為。
 
如果你可以花幾十個鐘去練等,一係你仲係好後生唔需要搵錢,再唔係就係唔駛做,可以全心全意打機,呢兩種人都好幸福。
 
遊戲商就係睇中大家死穴,今時今日嘅我哋,最重要嘅唔係錢,而係時間。
 
錢,我哋可能唔多,但時間,比錢更珍貴。
 
蔣薇
www.fb.com/maydreaming

COMMENT