2016/03/24

《無攻略嘅人生》

2016_03_24_蔣薇_MenClub Column
 
圖片來源:互聯網
 

行過便利店聽到兩個十零歲嘅學生對話:「喂,今期本Game書好似好正,買返本囉。」「上網咪有攻略囉,留返錢抽蛋好過啦!」唔記得有幾耐無買過Game書,但我永遠記得當年打機無攻略嘅年代。
 
曾經有個傳說,唔知捉晒150隻寵物小精靈就可以上太空抽夢夢,呢種真係童年回憶,唔知有幾多個被選中嘅細路真係戇膠膠咁去儲150隻然後再含淚發現被欺騙。
 
當年無上網,打機只可以靠自己,又或者去坊間買Game書,但當年仲係學生哥嘅我哋,又邊有咁多閒錢買Game書先得?一本就十幾蚊,但一隻開心Game都係廿蚊,買完書買唔到Game,大家一定識揀。
 
你會話,無Game書都可以玩,真,以一個正常人係S/L大法無限復活下,你總有爆機一日,但弊在,當年有好多Game都係日文……對於一個中學雞,仲未接觸日本愛情動作片前,真係一隻日文都唔識,唯有睇佢間唔中出現嘅漢字,例子玩超級機械人大戰,入面咩野根性、熱血、不屈、覺醒呢類,曾經我以為日本同香港好親近,大家都用差唔多嘅字,直到片假名、平假名出現……
 
有無試過一句法文都唔識就去法國?我未試過,但我試過一隻日文都唔識去打爆一隻日本Game!曾經我試過卡係一關,無論我同邊個對話,將地圖行勻晒,連牆角都睇晒有冇機關都係過唔到,就好似困係一個密室入面,唔知發生乜事……比著依家,我上網睇一睇就知點過啦……點駛浪費咁多時間……
 
係,今日我哋有攻略,而且有好多Game都係單一流水線流程,基本上你連諗都唔駛諗就可以打到最尾,但有時我都會諗返起當年無攻略乜都試吓嘅滋味。
 
玩機戰每一個角色都行埋去敵機度睇吓可唔可以說得,當進入一版特別關嗰陣,嗰種發現嘅喜悅今日我仲記得;玩三國志去唔同地方咩年份有咩武將,一八九年并州有張遼同趙雲,到後期鄧艾鐘會;金庸群俠傳我將地圖所有山嘅背後都行過晒,將主角第一招要打N次先升級嘅第一技升爆睇下勁唔勁;曹操傳為咗儲寶物圖鑑重玩N次;甚至軒轅劍嗰種低能合成系統都玩咗好耐先煉到蚩尤。
 
人生從來都無攻略,喺未知找驚喜,從嘗試中學習,在戇鳩後成長,以前的遊戲有無限可能,令我哋不知不覺間進步;今日嘅課金風氣、遊戲攻略又帶咗乜嘢訊息俾新一代?
 
蔣薇
www.fb.com/maydreaming

COMMENT