2016/03/31

《私竇不可缺少的東西》

2016_03_31_蔣薇MenClub Column
 
圖片來源:互聯網
 
對男人嚟講,點為之天堂?唔係一個全部都係女人嘅地方,而係一個無女人嘅地方。當你有返咁上下年紀,你就會開始發現擁有一個私人空間係幾咁難,有幾多男人會獨居?多數未結婚就同屋企住,結婚後就同老婆住,你最多都係擁有一間房、甚至一小角落。
 
我朋友有個私竇,其實係佢公司,但佢做Design嘅,真正辦工就只有一張枱同一部電腦,其餘空間就放晒自己鐘意嘅嘢,係我眼中,呢間唔係Office,而係私竇。
 
佢唔知喺邊買咗部經典街機返嚟,裡面幾乎有齊細個玩過嘅遊戲,拳王、街霸、1945、天地吞食、西遊記呢種大路Game,到你喺機舖見過但絕對唔會俾錢玩嘅都有,唔似嗰種N合一騙局,佢唔會改名當另一隻Game先。細個邊有咁多錢打街機,一蚊一局都好,你都係就住打,Con機?我寧願由頭打過,所以有好多Game我未曾爆過機……
 
鏢靶當然唔少得,幾條麻甩佬玩返幾局701;仲有一部足球機,唔似社區中心嗰種連人都打到鬆晒,仲唔可以轉棍,你鍾意點玩就點玩;桌球就無,但佢有副康樂棋,唔係一張紙個種,而係成塊木板打嗰隻,到依家我都未搞清楚正式規矩係點。
 
條友鍾意睇漫畫,經典漫畫都有齊,但恕不外借,因為借咗多數無回頭。你喜歡可以用佢部投影機睇戲,7.1就無,5.1都殺啦;想輕鬆D佢有部入門膽機你可以扮吓朝偉都得。
 
最最最最重要,其實係幾張可以成個人攤喺度嘅沙發,鐘意食煙飲酒都好,攤喺度吹水,回顧舊時,講波經馬經,討論時事新聞,幻想吓未來科技,甚至講吓鬼故同神秘野,隨時可以講通頂。
 
空間對男人好重要,呢個私竇可以真正令你休息,擺脫現實,喺呢個私密空間,一個只有男人嘅地方,好多嘢都好原始,好多嘢都好隨便,好多嘢都無所謂,更重要嘅係呢個私竇你隨時可以叫朋友上去,以上種種,打機、擲鏢、睇漫畫、飲酒食煙攤係度,有錢,你估做唔到咩?但你有錢將佢放喺你屋企,都只有自己一個。
 
男人嘅私竇,無乜嘢都得,就係唔可以無朋友。
 
蔣薇
www.fb.com/maydreaming

COMMENT