2016/04/29

《我的經典球員》

2016_04_29_蔣薇MenClub Column
 
圖片來源:互聯網
 
玩過Winning Eleven都知,玩到咁上下就可以解鎖一堆經典球員同經典隊,例如比利啊、馬勒當拿、告魯夫、簡東拿、碧根鮑華古烈治呢堆人等等,講真,聽我聽過,但我開始知咩係足球,當我識打Winning嗰陣,佢哋全部都退晒休。
 
對於我嚟講,佢哋只係一堆數值好高嘅球員,連佢哋點踢我都唔知,我知係好無知,我認,但我相信除非你天生就係老屎忽,唔係你都唔會一出世就知。
 
早排高比退休,感覺同佐敦好唔同,一個係成名嗰陣你追佢,另一個係睇住佢大,睇住佢壞,係Winning 4開始打,今日已經係Winning 16,仲多隻FIFA添!數數吓已經十幾年。
 
想當年,會用卡路士打前鋒同朗拿度李華度打三箭頭;會用奧雲加舒夫真高玩跑狗戰術;會用謝拉特史高斯玩中場浪射;用碧咸派路屈罰球。唔覺唔覺,新隊無晒佢哋蹤影,留低嘅係一班後起之秀,只可以從經典球員入面懷念當初日子。
 
曾經有班阿叔同我哋嘈一代不如一代,話馬勒當拿勁過美斯,話佐敦強過高比,世界大戰在所難免,我哋會笑班老嘢守舊固執,不知不覺我哋成為當日自己口中班老嘢。
 
有時玩高達,我都係鍾情於RX-78或者紅勇士呢種舊機體,或者我哋唔係追唔上潮流,而係我哋唔再瘋狂,唔再投入,唔再沉迷一件事,人去到某個年紀,有工作有家人,邊可以好似以前咁花大量時間去一件事,如果你偷到幾個鐘煲機都已經好幸福,新遊戲又好,新人都好,都同以前嘅喜愛度相差甚遠,我終於明,點解機舖總有一班阿叔會喺街霸出到5嘅時候,都仲玩返1。
 
我哋將時空減慢,或者停止,對於Winning,我玩新版都好,都總會懷緬昔日打通頂,砌咗幾百小時實戰過千場嘅時光。
 
直到球員成為經典,望住佢哋一集比一集數值下降,甚至連預設正選都唔係,你無辦法唔接受,我哋嘅童年,已成經典。
 
蔣薇
www.fb.com/maydreaming

COMMENT