2016/06/03

《女神?對唔住,我係無神論者》

2016_06_03_蔣薇menclub column
 
圖片來源:互聯網
 
有個成三十歲人都係零戀愛經驗嘅朋友,佢喺手機展示咗一張女仔相出嚟,的確幾靚,幾有氣質,但當我聽到佢稱呼呢個女仔做「女神」時,我就知,佢衰硬。
 
男神、女神呢種風潮係最近興起,條件好嘅男或女,都可以被尊稱為神。
 
我唔反對你有宗教信仰,之不過請你遵守返個Rules,你做得人信徒,請你唔好問點解你見唔到神,因為神從來唔會顯現喺你眼前,你可以透過聖經、可蘭經、佛經去感受神;亦可以透過IG、FB、報紙、雜誌等等去敬拜佢。可惜,真人係點?你唔會知,你亦無可能會知。
 
青春校園故,不外乎某個唔標青嘅主角,因緣際會受到某個男/女神青睞,最後又愛又傷咁喺埋一齊。曾經我都深深咁被呢種愛情觀吸引,不過廿歲人開始,我就知道呢種故事,只不過係呃小朋友,或者滿足某一批可憐蟲心目中嘅幻想而己。
 
男神女神,說到底,都係條件問題,IG咁多女神,你可能覺得佢高高在上,但係舉個例,女神去到劉鳴煒眼中,咪又係女人一個,佢是但執一件都正過佢哋啦,女神同雞,係唔同人眼中,有唔同演繹。
 
望下自己,再望下人哋,門當戶對,好傳統好老套,但好現實,神仙同神仙係一對,凡人同凡人係一對。喂,唔係喎,好多故事都講神仙同凡人一齊啦,係啊,一齊之後唔係死於非命,就係天各一方嗰種嘛。仲有!個凡人,都唔係平凡人,而係人中之龍,講真,我真係從來未聽過有神仙同小毒撚嘅愛戀故事囉。咦,唔係,可能真係有,不過個神仙之前一定係犯下彌天大罪,要下凡受苦,所以搵咗你呢個小毒撚嚟贖罪囉!
 
講真,對於我朋友呢種邪教信徒,我真係見到就嬲,叫佢去媾,佢就話這些機會不是屬於我的,日日都係度叫春,人哋有Post,就狗衝去Like去留言,諗住博女神見到渺少嘅自己;唯一娛樂就係J女神嘅新相,咁就滿足喇!?
 
兄弟,唔好怪我太直,當你J緊人個時,可能有人真係同佢面對面親密接觸中,你對住佢打飛機,佢可能幫人打緊飛機。Well……我知有少少露骨,換個含蓄少少嘅講法:是時候離開三次元,返回現實喇。
 
神之所以係神,係因為有人當佢神咁拜。想將女神變成你女朋友,首先……麻煩你將佢當返做人。
 
咩話?你都係覺得望吓就夠。你無得救㗎喇!入咗邪教幫你唔到!
 
蔣薇
www.fb.com/maydreaming

COMMENT