2016/06/10

《同女朋友影相,絕對應該收錢!》

2016_06_10_蔣薇
 
圖片來源:互聯網
 
影相,係男人嘅地獄,如果你係攝影師,可以Skip,篇文只適用於被折磨過嘅普通男人。你哋最高記錄試過俾女朋友彈過幾多次鐘,啊唔係,相先啱。
 
我試過同一個位置,同一個人,連續影咗十三次,最後女朋友用一個將就嘅語氣話:「好過之前少少,勉強收貨啦!」對男人講,要幫女朋友影一張滿意嘅相,仲難過考會考……
 
一張相有幾多學問?你上攝影論壇,大把討論同研究俾你睇,但原來影女朋友,可能水禾田出手都會慘死。Serve過客你就知,一個男客,一個女客,肯定係女客麻煩得多。
 
影相,講三樣嘢,相機、技術、物件,大師級,除咗相機勁,技術好之外,最重要係識得搵好題材,偏偏同女朋友影相,就係限死一個題材。真人靚過上鏡,以前我會覺得係好事,但如果你要同一個真人靚過上鏡嘅女朋友影相,就好大件事!
 
你唔會明,一個女仔點解會花幾個鐘去化妝;就如你唔會明,一個女仔可以花幾個字去自拍一樣,佢哋講求角度,高抄,唔好有雙下巴;側少少,塊面睇起上嚟瘦;同時間要就返佢哋想show off嘅野,例如風景、禮物、食物等等;完成後,仲有大量後期製作,例如加Filter,修圖,加字,拼相,打Caption。
 
我敢講,幫女朋友影相,絕對需要收費,因為佢哋比起廣告客不遑多讓,平時我對個客,會二話不說,你咁搞法,最少要收你2000蚊,只可惜,每一次同女朋友出街,你唔駛俾埋對方錢已經還神,你仲想收佢錢?除非你痴Q咗線。
 
有句嘢我放喺心好耐,不過我都無勇氣講:「免費嘢,係咁上下啦。」不過我好怕之後俾佢用返呢句喺其他場合度反擊我,咩場合?自己諗。
 
所以,對於我哋呢班唔識影相嘅可憐蟲,我只有以下三個忠告。
 
一) 將勤補拙,影多幾張,女人有時在乎過程,再完美嘅野佢哋都唔會第一時間同意,硬係要試多幾張,同女朋友買過衫你就知。
二) 沉默是金,有一次我唔小心講咗句:「係靚嘅亂咁影都靚啦!」我講緊個景,點知就俾人對號入座,所以千祈唔好有任何怨言。
三) 假!假!假!打死都話好靚,千祈唔好笑,千祈唔好講真話,盡量保持心境開朗。
 
有時我心諗,如果MenClub有女朋友攝影課程,我第一時間會報,幾千蚊,唔慳得,至於Model係邊個?你哋自己講啦!我知你哋實會講:「哪有女!」我都同你哋講,依家你無,但你將來會有!(好似係)
 
如果你都受女朋友折磨過,我私人醒多個方法俾你,每次我影,都會影大量making of,而事後我睇返,總會會心一笑。
 
蔣薇
www.fb.com/maydreaming

COMMENT