2016/06/16

《夢想系列,兄弟去旅行》

2016_06_16_蔣薇 MenClub Column
 
圖片來源:互聯網
 
旅行,細個同家人去,結婚後同老婆去,生仔後同小朋友去,人生六十載,只有幾年時間,喺家人同家人之間的狹縫中,偷得時間同兄弟去旅行。
 
同家人去旅行,要照顧到老少咸宜;同女朋友去,又要諗男女通用。唯獨是同兄弟去,先係屬於男人嘅旅程。做得兄弟,喜好同性格都唔會差太遠,肯定有唔少共同話題,Plan行程,基本上絕少機會會有分歧,而且唔存在要照顧其他人嘅情況。
 
大學時代,總會睇過美國青春喜劇,幾個兄弟踏上旅途,有冒險、有豔遇、有笑料,好似醉爆伴郎團式嘅旅程,一直我都好嚮往呢種故事,幾個兄弟一齊Road Trip,遊Vegas,喺海灘一齊吹水飲酒睇女。
 
可惜,呢種旅程,幻想得多,現實講,要四個人一齊放低家庭、工作、生活瑣事,再加埋十幾日假同幾皮嘢,唔好講咁遠,約齊人入Camp或者飲嘢,都係一件艱鉅任務。
 
任何事都有藉口,都有困難,我哋一次又一次將旅程押後,但幾年後發覺,愈後,負擔就愈重,你就愈難再提起勁去。
 
有次飲醉酒,大家幻想如果中咗六合彩會點,當然唔少得講衰野。但我好記得有人講:「我會包起大家去一次一個月嘅旅行,請假人工我出,行程洗費我包,總之大家可以玩得開開心心。」
 
大家突然靜咗落嚟,兄弟旅行,話難唔難,但不知不覺變成夢想系列,只要你有返咁上年紀就會知,夢想系列,即係唔會發生嘅事。
 
畢業煩無錢,工作煩無假,有家庭煩行唔開,到大家退休,真係有時間,呢次Road Trip已經唔再係青春喜劇,而係老人活動;又或者到時,經已唔再齊腳。到你環遊世界之時,望住美景感嘆時,你會發覺身邊好似差咁少少咁。
 
明知結局,前面條路再行落去都行唔通,等待奇蹟同戲劇性發展,只係安慰自己。
 
青春,就係不顧一切,就係唔諗後果,就係打死罷就,諗得太多,證明呢套青春劇,早已落幕。
 
如果,兄弟同你講佢聽日就出發,機票都幫你買埋,你敢唔敢踏出呢一步?
 
要諗諗?恭喜你,大個仔喇。
 
蔣薇
www.fb.com/maydreaming

COMMENT