2016/06/30

《Stephy情意結》

2016_06_30_蔣薇MenClub Column
 
圖片來源:互聯網
 
同女朋友講起Stephy,佢話:「其實佢真係唔靚囉。」Okay, I know,女人有幾可讚人靚先得㗎?我好隨便咁答佢:「唔係啊,我都幾鍾意佢。」佢即時問點解?我靜咗一靜……腦海中有一個唔敢講出口嘅答案。
 
每個時代嘅男人,都有一個伴我長大嘅女神,有人話係鍾楚紅、有人話係李嘉欣、有人話係朱茵、有人話係Dada,而我嘅女神,就係Stephy。
 
喂,佢何德何能啊?又唔係高、又唔係靚、又唔係性感、唱歌仲走音、出書又寫錯字,師兄,你驗一驗眼好喎!我知,我知你哋心入面已經媽聲四起,之不過,你冷靜少少聽埋我講先啦!
 
當年,Stephy仲係Cookies入面,比起Twins,九餅真係有少少遜色,唱完一輪就無影又拆伙,點解鍾意佢?原因係WINMX。如果你有返咁上下年紀,就肯定會知係乜,當年,想搵歌一定用 WINMX,免費(盜版)唔用就笨啦,故事唔係因為我搵到一首Cookies嘅歌,而係一個好吸睛嘅題目──AV鄧麗欣。
 
馬雲話,假貨有時比真貨好,咁我會覺得「AV.鄧麗欣」比「真.Stephy」好,真嘢唔會做嘅,翻版都做晒,最緊要係,呢件翻版係日貨嘛。
 
每個時代都有紅星,女優界都係,個陣夕樹舞子、小沢圓都已經係神枱,對於一個小伙子講,佢哋太遙遠,「AV.鄧麗欣」就唔同,當年同我哋一齊起步,一起奮鬥,唔離地之餘,仲好有親切感,今時今日已經成為無人不知嘅「吉沢明步」。
 
點解鍾意Stephy,好大程度都係因為呢個兒時回憶,話晒都貢獻過唔少血氣同精神俾佢嘅翻版。
 
人會長大,女神亦會變老,唔記得幾時開始,「吉沢明步」嘅新作品,我已經唔再追,甚至敬而遠之。有次唔覺意睇咗佢新作,咁多年拍得嘅題材都拍過了,再拍落去,愈拍愈偏、愈拍愈濫,而佢亦從一線女優,淪為大家都識,但唔會特別去追嘅雞肋。
 
有時我會諗,不如你引退,然後搵個好歸屬啦,見到佢殘咗老咗都上陣,唔係嘔心,而係痛心,為萬千男士演出過嘅佢,值得擁有自己嘅幸福。
 
就係咁,我心入面解釋咗點解對Stephy嘅情意結。
 
然後,我就同女朋友講:「你唔覺得打排球嘅女仔特別吸引咩?」
 
完。
 
蔣薇
www.fb.com/maydreaming
 

COMMENT