2016/07/08

《球場上的阿伯》

uncledrew
 
圖片來源:互聯網
 
每個球場,無論足球、籃球、羽毛球,都會有一個駐場阿伯,阿伯嘅定義係Over 60歲,頭都白晒,做得你阿爺嗰種。
 
細個嗰陣對阿伯無乜太大感覺,只係覺得佢射咗幾十年,真係好鬼準,每日定時八點就會見佢拎住個波一支公行落嚟,基本上成個球場嘅人都認得佢;到差唔多三張嘢嗰陣,身體機能開始走下坡,有班日日呻老呻唔得嘅朋友出現時,你先發覺阿伯嘅厲害。
 
好難想像到自己六十歲嗰陣會點,腰酸背痛風濕就梗喇,仲有冇可能又跑又跳成個幾兩個鐘?面對跑得快過自己,跳得高過自己嘅後生仔,仲有冇膽講:「跟一隊!」
 
百事之前出咗個廣告「Uncle Drew」,搵咗剛剛NBA冠軍隊入面嘅Kyrie Irving扮阿伯喺街場度打波,雖然你好清楚佢哋NBA球員落場扮老蝦正常人係得啖笑,但係故事講阿伯想重拾當年風采,搵返班舊隊友一齊落場,又真係有幾分感動。
 
故事入面Uncle Drew講咗句:「年輕只係心理問題。」係,無人規定幾多歲先可以落場,你睇保方38歲仲留喺場度有心有力,當打年齡好多時都係藉口,你係勁嘅,幾多歲都係當打。
 
令自己走下坡嘅,唔係年齡,而係自己。
 
退步,唔係因為你老,而係你無再練習,無再比賽,無咗當初份熱誠。每次有人話自己老喇,我都會指指球場阿伯,同佢講,你夠人哋老?人哋仲每晚打足幾場,你細人一半有多,唔撚好再扮老嚟做藉口好嗎?誠誠實實講自己咎由自取好唔好?
 
球場旁邊就係公園,只係相差幾步,問吓你自己,到你做咗阿伯嗰陣,想係公園行吓石春路,擺吓手,耍吓太極,做公園阿伯?定係踏入球場,同班後生仔鬥過你死我活,做個球場上的阿伯?
 
有人話,睇波不賭波,睇來幹什麼;
計我話,睇波不打波,睇來幹什麼。
 
蔣薇
www.fb.com/maydreaming
 

COMMENT