2016/07/15

《有水抽到盡的「廢柴」》

2016_07_15_蔣薇MenClub Column
 
圖片來源:互聯網
 
老實講,對於某班「球迷」,其實我唔會將呢班人稱為球迷,因為影衰晒,每逢有大賽同顛峰對決,好似皇馬大戰巴塞、騎士大戰勇士咁,完咗之後都總會出晒嚟抽水。
 
「瞓咗無睇,勇士大抄騎士幾多分?」
「破常規賽記錄喎~~最後咪又係輸!」
「美斯要坐監,丙朗就拎歐國冠軍,一睇就知邊個係球王啦!」
 
呢種事後抽水,真係好令人討厭!利申,我個人都唔鍾意美斯,唔鍾意Curry,但呢個世界有樣嘢叫,識英雄重英雄!
 
就算係占士同丙朗都好,就算贏完對手,都會對對手敬重有加,兩個男人企係同一個球場,展開生死榮辱,賭上尊嚴嘅對決,總有一個輸,贏同輸唔單止係實力,仲係天時、地利、人和,無人敢講自己贏硬,只可以講會出盡全力去戰鬥。
 
可惜總有班廢柴,只要人一輸就會對其一沉百踩,踩到體無完膚,如果佢哋係持平講技不如人都算,竟然大言不慚咁叫人返屋企啦廢柴,真係人唔笑,狗都吠!
 
勝利者,絕對有資格去嘲笑對手,不過請搞清楚,你哋極其量只係勝利球迷,從來無落場面對呢個你口中嘅廢柴,當然我亦唔相信你哋有能力有膽色去面對。有個四字成語,叫狐假虎威,某程度就好足以形容呢種行為。
 
一個無落過場嘅人,永遠唔會明白識英雄重英雄呢個道理,因為一個無能力嘅人,永遠唔會明咩係能力,更唔明尊重對手,就係尊重自己。
 
無奈,呢種嘲笑嘅生態一直盛行,我唔明睇波用一個欣賞嘅態度去對待球員有乜咁難,插水一時之快,係旁人睇落得啖笑,然後就會覺得好肉酸,把口生係你度,唔等於你要言不驚人誓不休,唔代表你要抽水抽到乾。
 
男人,講風度,講修養,唔尊重人,又點會得到其他人尊重,網上世界你係威係勢,現實?咪又係得把口嘅廢柴。廢,唔緊要,廢得嚟又要口臭刻薄,仲好意思話係男人?
 
蔣薇
www.fb.com/maydreaming
 

COMMENT