2016/07/22

《會考,同初戀無分別》

2016_07_22_ 蔣薇MenClub Column
 
圖片來源:互聯網
 
每年放榜,見到班學生面對人生第一場挫折,就會感嘆自己老了,講真,鼓勵班學生就免喇,當年仲叫會考而唔係DSE,十幾年前嘅嘢唔再講。
 
不過會考總算對人生有好大影響,第一次面對如此沉重嘅考試,唔似得中一至中五,今次唔係留班咁簡單,而係好可能無書再讀,離開每日朝八晚五嘅中學,同學各散東西,生活中一切一切都唔再相同,最可怕嘅,係踏入社會。
 
會考就好似初戀,第一次係最緊張,最看重,可惜在情場中經驗尚淺,除咗恐懼同誤判外,更多人衰喺唔知自己想要乜。
 
情場初哥只想求其搵拖拍,唔理好醜但求就手都算,拍咗陣知唔適合自己都繼續落去,同時放軟手腳。
 
有好多人明知自己唔鍾意讀書,但都繼續讀,又唔放心機去讀,最後考得差又覺得慘,呢種人我最鄙視。
 
反過來中學時代有個同學,明係唔讀書,連會考都唔去考,全部Abs,連cert都唔拎,謝師宴嗰陣我哋問佢,點解你連考都唔去考呢?
 
佢答:「唔識去考嚟做乜?呢個世界無僥倖,唔識唔會高分,去嚟都浪費我時間,不如拎時間做自己嘢好過!同埋我都無打算繼續讀,如果唔係屋企人要我中五畢業我一早就唔讀啦!你睇好多人根本就唔知自己做乜,我唔讀書就唔讀好誠實,有班人口裡說讀,最後咪又係得幾分,明眼人睇就知佢哋無努力過啦!
 
如果你哋無諗好將來要點行,就算你考得再好都無用!」
 
當年我仲成舊飯咁唔知佢講乜,我心諗你零分,我有十幾分你仲死撐講到自己好成熟。
 
今日佢已經有自己嘅工程公司,每個月出糧比人都出成百萬,睇返當年考到28分嘅同學,都唔夠佢搵錢多。錢唔係量度人嘅唯一標準,但佢事業上嘅成功係無任何人可以想像。
 
會考重唔重要?今日回首一望,得啖笑,以前五年磨一刀,今日三天一小戰,五天一大戰,唔合格?無人會可憐你,更隨時無咗份工。
 
反而最影響人生嘅,係當年唔知自己想行咩路,會考就去考,補習就去補, Ive Asso又一齊去,有種跟大隊嘅感覺,兜兜轉轉,最後先發覺自己浪費太多時間做唔係自己鍾意嘅事。
 
人愈大,時間愈少,已經唔到我哋再兜路。
 
今日我哋已經係情場老手,唔係我哋特別懂愛,而係我哋終於知自己要乜。
 
蔣薇
www.fb.com/maydreaming
 

COMMENT