2016/07/29

《阿叔當年玩Pokemon,你都未出世!》

2016_07_29_ 蔣薇MenClub Column_pocket mon
 
圖片來源:互聯網
 
一星期前,我對Pokemon Go完全不感興趣,作為一個小學已經捉比卡超嘅第一代粉絲,Go簡直係對Pokemon嘅侮辱,小學雞式嘅拋波,集郵,然後打所謂嘅道館,近乎不可控式,只睇數值屬性,毫無可玩性及策略性可言,所以,我當日同自己講,唔會玩呢隻Game。
 
上架當日,Lunch成條街嘅人都玩緊,一班連四大主角個名都叫唔出嘅人都拎住部電話玩,睇到就眼冤,須知道一隻遊戲,入門門檻愈低,連細路阿嬸同港女都玩嘅,我只係諗到Candy Crush呢種洗腦Game。
 
直到有個朋友叫我玩,我問佢:「隻Game有乜好玩?」「你唔玩過又點知唔好玩?」「只係睇個系統都知唔好玩啦,捉捉捉,連港女都玩就知唔慌好嘢!」
 
朋友唔出聲打量咗我一陣,然後問:「你知唔知你依家似咩?」「唔知。」「似公園成日指指點點嘅阿叔啊!嗰班乜都未試過,成日講幾十年前點點點,然後指指點點,沉迷係自己世界,唔肯接觸新事物嘅阿叔。」
 
俾佢講完,我下載咗隻死人Game玩吓,如我所料,唔好話最新嘅太陽月亮版,佢個系統除咗係用GPS加實景玩之外,連第一代遊戲都唔及。然後我行出街捉吓小精靈,所謂知己知彼,百戰百勝,唔玩過又點搵到Point去批評呢?
 
夜晚放工時間,條路上面有五成人都玩緊,對住個Mon捉,經過一兩個鐘體驗,我終於同意朋友鬧我嘅嘢,我真係老喇,成個阿叔咁。
 
邊個話Pokemon一定要四招技對戰?
邊個話一定要有火箭兵團?
邊個話遊戲一定要有故事?
邊個話打機只係著重遊戲本身?
 
先入為主咁覺得Pokemon係點,已經係老頑固嘅行為,當年第一隻遊戲都係由零開始,今日有新玩法,我哋就唔習慣,同剛剛出手機Game時,有班阿叔仲係堅持玩返機舖四百合一嘅懷舊Game一樣。
 
世界每日都變,我哋每日都變,懷舊無錯,但守舊就係問題,好多人都抱住當年點點點去做人,唔會有進步。
 
今日遊戲唔再單單係遊戲,而係人與人互相,同現實世界融合,唔係你拎住部手提遊戲機,然後活在自己遊戲世界。
 
當你夜晚去到公園行個圈,平時班唔肯出街喺屋企嘆冷氣嘅人都走晒出嚟,喺公園行嚟行去,幾個朋友一齊玩,情侶拍拖玩,夫妻連小朋友一齊玩,甚至同埋自己六十幾歲嘅父母散步兼玩遊戲。
 
望到一大班人做緊同一件事,有種無形喜悅出現,喺公園有人大叫有水戰龜嗰陣,成百人向同一方向前進,有人歡呼,有人怒罵。班專家話,科技令人與人距離遠咗,Pokemon GO一巴一巴咁車落去佢哋度,遊戲其實可以拉近人與人。
 
有好多人仲死撐,睇你班熱潮撚玩得幾耐?一個星期就無影啦!
 
我想喺度同班世外高人講,至少呢一個星期,玩嘅人開心咗一個星期,朋友間聚會唔再係飲嘢唱K,而係行落街成班人嘻嘻哈哈,情侶之間亦唔再係行街睇戲食飯。
 
最後想同班阿叔講,試吓搵返當年你打機嘅初心,將你杯入面裝咗幾十年嘅死水倒咗佢,裝入新鮮水,人都會年輕十年。
 
蔣薇
www.fb.com/maydreaming
 

COMMENT