2016/09/01

《那些年的開學日》

2016_09_01_maydream menclub column
 
圖片來源:互聯網
 
人老咗,好多時就會數當年,見到一街學生哥要返學,數數手指原來畢咗業已經兩隻手都數唔晒咁多年,暑假?關我咩事?每日都只有返工同放工……不期然,會諗返當年開學日係點。
 
著住件老土嘅裇衫校褲皮鞋,總會諗辦法點樣先無咁柒,攝半衫、唔攝衫、整對木底皮鞋、整個唔會比人捉到嘅髮型。入門口總會撞到班成個暑假都無見嘅同學,唔算熟都好,都好有親切感認得大家,然後就會去返屬於自己嘅操場角落,喺早會之前大家都劃分晒領地,圍內嘅會企埋一堆,你亦好知道你想搵邊個同學去邊就會搵到。
 
開學最期待嗰吓莫過於分班,好多時你唔會知自己係咩班,直到你返到去睇個分班表,究竟你同女神一班,定同班豬朋狗友一班,企到埋條隊先知。有時唉一聲發覺自己班兄弟唔同班,然後落入一個陌生環境,多年後睇返,就係呢次轉班先令你識咗班新兄弟,通常高中唔再轉班嗰陣先係最熟。
 
當年無咁多嘢煩,雖然大家手上可能只有幾十蚊零用錢,食唔到貴嘢,更唔好話唱K睇戲,但你永遠都搵到節目,上同學屋企,一齊行依家唔會行嘅商場,食十幾蚊有找嘅冷麵,然後搵個球場Hea吓,食飯時候各自歸家。
 
中學時代,你唔需要憂交咩咭數,更唔需要諗買樓結婚,亦唔需要諗點係職場裡面生存同上位,煩嘅只有功課同考試,講真,功課考試睇返轉頭算得係乜?放學返屋企嗰陣,個天都仲係光嘅,世界多美好……
 
細個好想長大,第時搵到錢,要買乜乜乜乜乜;依家乜都買到,但你會發現乜都無感覺,最貴嘅遊戲機同大量遊戲放喺度,得個擺字,放工返到屋企食個飯沖個涼,已經無心機再打開部機,寧願早少少瞓好過,第二朝返工無精神就仆街,俾著以前?搵幾堂個老師好蝦嘅,瞓到流口水流到成本書都係都仲得。
 
今日Lunch time,我喺天台閉眼幻想自己仲係中學生,幻想開學發生乜事,諗得好開心,開心完之後,要落返去做嘢喇。
 
蔣薇
www.fb.com/maydreaming
 

COMMENT