2016/09/09

《認真到極致,係男人的浪漫》

2016_09_09_蔣薇MenClub Column_認真到極致
 
圖片來源:互聯網
 
每個男人總有奇奇怪怪嘅喜好,無論係運動、收藏、打機、甚至係不良嗜好,男人都有佢著緊嘅堅持。
 
我識一個打籃球每日風雨不改,要射入一百球三分先返屋企嘅On9;亦有一個儲貴波鞋儲到要租倉去放鞋,但自己著緊對平野嘅On9;又或者一個打機打到天翻地覆,打到去全球排名十名內嘅On9;同埋食煙食到聞一聞都分到邊個牌子邊隻煙嘅On9。
 
我成日都話,你做一件事會俾人笑,只係因為你未做到極致。有人飲紅酒,係餐廳求其亂指,飲支貴嘢又唔知佢貴係邊;亦有飲紅酒,要考試,要做功課,要Mark記錄,最後做埋品酒師。同一件事,型唔型唔在於你做乜,而係你點做,同埋你做到幾盡。
 
網上流傳當年金庸群俠傳Online,都成十幾年嘅網遊,今時今日仲有個玩家堅持到最後,成為整個伺服器唯一嘅玩家,當年數幾十萬計嘅遊戲,走吓一個,棄吓一個,當你堅持,唔會跟隨其他人,只專注係一件事,你就會成神。
 
或者,你係一個On9嘅神,但我作為男人,會欣賞呢種浪漫。
 
女人會問,你呢種堅持,有意義嗎?賺到錢嗎?因為甚少女人會堅持一件事,潮流興乜就做乜,容易搖擺,容易被左右;男人都係,但男人之中總有班On9存在,執著係某些不為世人所認同,又或者非主流嘅事上面。
 
做一件事,唔一定受別人認同,更唔一定係為錢,可能只係一種情意結,一種無關痛癢嘅堅持。過程中你會受到好多質疑,被好多無知又多口嘅人恥笑,如果你放棄,你就係徹徹底底嘅On9;反而你堅持落去,你會成為神,一個唔需要教徒,唔需要信仰,只需要一個人嘅信念之神。
 
有時我同人分享呢種信念,佢會將我個題目改為:柒到盡頭就是型。
 
Well,意思相同,我唔介意你咁講,但我會繼續做你認為係柒嘅事,我會好肯定咁同人講,今日你覺得柒,係因為我未做到盡,如果我去到盡個時,連我自己都驚!
 
男人嘅浪漫,有時唔需要人認同,自己知,自己明,就已經夠晒型棍!
 
蔣薇
www.fb.com/maydreaming
 

COMMENT