2016/09/15

《成年後的中秋》

2016_09_15 蔣薇MenClub Column
 
圖片來源:互聯網
 
中秋節,曾經係每年最期待嘅節日,因為你可以拎正牌出夜街,仲明正言順咁玩火,火喎!細個嗰陣開個煤氣爐都俾阿媽鬧,但中秋你就可以燒到成條公園石路都係蠟燭,成班偷偷地喺後樓梯煲蠟,簡直係夢幻般嘅節日。
 
到你有返咁上下年紀,你會發覺,咦,今日就係中秋喇。哦,多一日放咁囉。開心同喜悅同細個比,差天共地。
 
如果人生以十年作一階段,十歲中秋、二十歲中秋、三十歲中秋,可以話完全唔同。
 
十歲左右我哋仲係喺公園玩,拎正牌玩吓火,玩螢光棒,同公園班三唔識七嘅細路一齊整蠟燭長城,將成個公園圍一個火圈,一有風就護火,熄咗又再點,成晚就係點吓熄吓,咁就玩一餐。今日睇返轉頭,我就好似當年嘅老豆咁,坐係旁邊食月餅吹水,心諗,都唔知有乜好玩。但作為一個細路,嗰陣記憶中,係好玩到不得了。最開心係基本上你可以見晒所有朋友,平時九點鐘已經要熄電視瞓覺,中秋九點鐘仲有一大班人喺公園玩,真係一年一度,早排嘅Pokemon熱潮令我諗返起中秋節成班人嘅盛況。
 
二十歲左右,人大咗都唔會玩蠟燭喇,中秋亦升級咗,唔再係出夜街,而係通頂,一班同學朋友約去郊野公園燒嘢食,又或者去海傍飲吓酒,喺K房唱通K再食早餐。有時Friend搭Friend咁出去玩,識吓異性,好彩嘅仲有得發展吓。中秋意義已經由開心,變成狂歡。
 
三十歲左右,通頂?要諗諗喎,要通頂唔難,但要搵到一班人陪你通頂就好難,唱K燒嘢食飲酒,有乜未做過?夜少少都OK,通頂好傷身啊,不如早少少返去休息啦。
 
中秋從來都無變,變嘅係我哋,唔同年紀有唔同世界,所以唔係中秋無氣氛,係你份人無咗對中秋嘅憧憬。
 
三十過後,最感恩係公司放早,可以返去做節,早少少買餸返屋企加料,齊齊整整睇吓電視,然後食吓月餅飲啖茶。睇吓自己,已經由當年玩蠟燭嘅細路變成食月餅嘅大人,中秋係屋企做節而唔出街,同朋友?只餘吓WhatsApp轉貼中秋節快樂的Message。
 
蔣薇
www.fb.com/maydreaming

COMMENT